Бехкама тIатоха предложени

Бе́хкама тӀато́ха предложени (эрс: придаточное условия) — кертерча предложене чухь дувцаш дола дар малагӀча бехкамца хила йиш я хьа а хьокхаш, фу дойя? фу дергдале? фу даьдаларе? фу хуле? фу хургдале? фу хиннадаларе? яхача хаттарех цхьан хаттара жоп лу тӀатоха предложенеш ^[1] ^[2].

Бехкама тӀатоха предложени кертерча предложенеца ювзалу тӀатохача предложене сказуеме тӀатохача форма новкъосталца. Бехкама тӀатохача предложене ши форма я: белгала-бехкамеи белгалза-бехкамеи.

Белгала-бехкама тӀатохача предложене белгалду хила тарлургдола дар. Цу предложене сказуеми хул хандеша белгала-бехкама соттам. Масала: Цо хьоца дийцачох хӀама ца хуле, садовлехь юрта ваха веза со. Ӏалаьмате сиха операци ца йойя, Ӏусмана болх кхераме ба.

Белгалза-бехкама тӀатохача предложене хьахьокх хила тарлургхилар белгала доаца е хилара шеко йолаш дар. Укх предложени сказуеми хул хандеша белгалза-бехкама соттам. Масала: КӀеззига хьо тӀехьаяьннаяларе, йиӀиг кхервме яр. Билет хиннадаларе, театре гӀоргвар со.

Белгалза-бехкама тӀатохача предложене сказуеми хила тарлу шийца «мара» яха куцдош долча яхача хана деепричастех. Масала: Хьо дукха гайна мара, кино гӀоргдар вай.

Белгала-бехкама а белгалза-бехкама а тӀатохача предложеней ерригача формашка хила тарлу нагахьа, нагахьа санна яха хоттаргаш. Масала: Нагахьа санна кхоана догӀа ца делхе, вай хьунагӀа экскурсе гӀоргда. Нагахьа аьттув боацаш моттиг хуле, юхавеллахь, са доттагӀа ^[1].

Хьажа иштта

ТIатоха предложенеш
Дара-куца тIатоха предложенеш
Хулачун тIатоха предложенеш

Белгалдаккхар

↑ ¹ ² Оздоев, 2006, оа. 348.
↑ Гандалоева, 2018, оа. 349.

Литература

И.А. Оздоев Р.И. Оздоев. ГӀалгӀай метта грамматика. — Назрань : «Сердало», 2006. — 248 с.

А.З. Гандалоева. ГӀалгӀай мотт. — Назрань : «КЕП», 2018. — 349 с.

[_5d384b085507eb74-1] ¹ ² Оздоев, 2006, оа. 348.

[_dc52af51a3c6b78a-2] Гандалоева, 2018, оа. 349.

[1]

[2]