Гарданаькъан Абузара Малика

Гарда́наькъан Абуза́ра Малика
эрс: Горданова Малика Абузаровна
Яь таьрахь	2 лайчилла 1947(1947-11-02) (78 шу)
Яь моттиг	СССР Казахий ССР
БӀорахол	Россе Федераци
Леладу гӀулакх	хьехархо, юрист

Гарда́наькъан Абуза́ра Малика́ (эрс: Горданова Малика Абузаровна; 2 лайчилла 1947, Казахий ССР) — Россе Федераце дукха дика хӀамаш карагӀдаьнна хьехархо, ГӀалгӀай Мехка дукха дика хӀамаш карагӀдаьнна хьехархо, РФ къаман дешара башха саг, «Учитель года — 96», тархьархо, оазархо, суртанча, модельер. Хьехархочулла къахьегаш хиннай 45 шера. Цо Пхьилекъонгий-Юртарча ишколе хьайийлай ТӀема сийлен музей, РФ хьалхарча турпалхочун Осканаькъан Суламбика турпала гӀулакха́ хетаяь зал. Диъ кинижка яздаьр: «Наедине с собой», «Рабочие поездки, ставшие окном в мир», «Музей Славы. Сохраненная память», «Стихи. Проза. Публицистика».

Биографи

Дешар

Горданаькъан Малика яьй 1947-ча шера лайчилла бетта 2-ча дийнахьа Казахий ССР Павлодара областа Черноречье. Ишкол яьккхачул тӀехьагӀа, 1966-ча шера из болх бе йолаеннай Пхьилекъонгий-Юртарча ишколе пионервожати йолаш. 1980-ча шера «Грозненский рабочий» газета тӀа яздаьчох, цунна зӀамагӀйолча хана лётчица хила безам хиннаб, цхьа юкъ хиннай цо сурташ дехкаш, суртанча хила гӀерташ, тӀехьагӀо уйла е йолаеннай модельер хила. Ишкол яьккха йоалача хана, цун уйла сецай юриста балха тӀа, цхьабакъда цӀагӀарча наха къоабалдар бахьан долаш, Малика деша эттай университета тархьара факультете. 1973-ча шера цо дийша йистеяьккхай Нохч-ГӀалгӀай паччахьалкхен университета тархьара факультета заочни отделени.

Болх

1970—1975 шерашка цо болх баьб ишкола кулгалхочун когаметтаоттар йолаш. 1975—1980 шерашка завучалла болх баьб Пхьилекъонгий-Юртарча № 2 йолча ишколе. Цунна цхьан шера аьттув баьннаб ишколе кабинетни система е а, кабинеташ кийчъе а, методически болх оттабе а. 1981-ча шера Малика Пхьилекъонгий-Юртарча № 1 йолча ишколе кулгалхочулла хьожаяьй. 1982-ча шера, яха моттиг хувцар бахьан долаш, из дӀахьожаяьй кулгалде ТӀой-Юртарча юкъерча ишколе. 1989—1990 шерашка цо болх баьб Наьсарерча РОНО кулгалхочун когаметтаоттар йолаш. 1990-ча шера юха яха дӀаяхай Пхьилекъонгий-Юрта, цига цо цхьан юкъа болх баьб тархьара хьехархо йолаш. 1997-ча шера денз цо болх баьб Пхьилекъонгий-Юртарча № 13 йолча ишколе (ЮШ № 2, юха цӀи тиллай 2010-ча шера).

Цу ишколе цо хьайийлай Сийлен музей, РФ хьалхарча турпалхочун Осканаькъан Суламбика турпала гӀулакха хетаяь зал. Музей гӀулакх доагӀаш я Липецкерча авиацентрацеи, иштта мехкарча кхыча музеяшцеи. ТӀема сийлен зала чу Пхьилекъонгий-Юртарча Сийлахь-Боккхача Даьхен тӀема доакъашхоех хоам беш йола дукха экспозицеш я.

1990—1997 шерашка Малика кулгалдеш хиннай тархьара хьехархой методически цхьанкхетара. 1996-ча шера из коттаяьннай «Учитель года» яхье. «Проблемы преподавания истории и права в школах Российской Федерации, организованных Советом Европы» тема йоашхаш, дакъа лоацаш хиннай Домбаеи Москвеи дӀакхихьача семинарашка. РФ дешара министерствос, иштта «Учительская газета» яхача газета кулгалхоша йийха, цо дакъа лаьцад Австралеи, Ингалсий мехкеи, Шотландеи дӀайихьача «Система образования» яхача семинарашка. 2004-ча шера дакъа лоацаш хиннай «Учитель года» яхача яхье котало яьккхача хьехархой Санкт-Петербурге хиннача гулламе. 2016-ча шера Маликас арахийцад «Наедине с собой» аьнна цӀи тилла, байташ тӀайола кинижка, цун презентаци дӀайихьай ГӀалгӀайчен Къаман библиотеке.

2022-ча шера Маликас арахийцад «Рабочие поездки, ставшие окном в мир», «Музей Славы. Сохраненная память», «Стихи. Проза. Публицистика» яха кинижкаш. Хьалхарча шин кинижкаш тӀа цо бувц музей кхоллаш ше баь болх, цул совгӀа дешара системе шийна карагӀдийннар а.

СовгӀаташ

• «За трудовую доблесть» майдалг (1988 шу)
• «Учитель года» (1966 щу)
• РФ къаман дешара башха саг
• Россе Федераце дукха дика хӀамаш карагӀдаьнна хьехархо
• ГӀалгӀай Мехка дукха дика хӀамаш карагӀдаьнна хьехархо

Белгалдаккхар

ТӀатовжамаш

• Ведажанаькъан Марем. Восторг души и радость бытия (эрс.) // «Сердало» : газет. — 2015. — 18 апреля.