Зангенаькъан Хасолта МикIаьил
| Зангенаькъан Хасолта МикIаьил | |
|---|---|
| Ваь таьрахь | 1936 |
| Ваь моттиг | Насыр-корт, Наьсаре |
| Паччахьалкхе |
 СССР →  Россе Федераци |
| Ӏилман никъ | журналистика |
| Белха моттиг | «Сердало» газета редакци |
| СовгӀаташи премеши | «КарагӀдаьннарех» яха орден |
За́нгенаькъан Хасолта́ МикӀаьил («Ленин никъ», «Сердало» оагӀонашта къахьегаш хинна хоамбоаржабархо ва.
Вахара юхьиг
Зангенаькъан МикӀаьил ваьв 1936-ча шера маьтсела бетта 10-ча дийнахьа Наьсар-Керте, Зангенаькъан Хасолтаи Зазой Элмарзий РабиӀатеи дезале. МикӀаьила да Хасолта дийша, гӀалгӀай къам Сибаре дигале шоай юртарча юхьанцарча ишколе болх беш хиннав. Уж верригаш пхи воша хиннав: Ахьмад, Мухьмад, Хасолта, ХьакӀаьш, Мехьти. Хасолта гӀалгӀай арабахале кхелха хиннав, совшерг эккхар бахьан долаш. Цу пхе вешех, Сибренах чакх а ваьнна, цӀавенар алхха цхьа Мехьти мара хиннавац. Алма-Ате баьхаб МикӀаьилар дезал, цига ваьгӀав из ишколе деша а. Вай цӀадоагӀача хана, 20 совгӀа шу даьнна, кхийна нийсвенна зӀамига саг хиннав из. ДӀахо деша ловш волча цун таро хул [[Нохч-ГIалгIай паччахьалкхен хьехархой института историко-филологически факультет]е деша отта а из чакхъяккха а [1].
Болх
Йоазонца чам болаш волча цо каст-каста кепа еттар «Сердало» газета оагӀонаш тӀа ший корреспонденцешта, статьяшта, фельетонашта. Наьсарен районе цу газета цӀерагӀа пункт хьа а яь, корреспондент волаш, къахьегар цо. Беча балхага хьежжа, 1963-ча шера СССР хоамбоаржабархой юкъарлоно дӀаэц Хасолта МикӀьаил. ДӀахо дукхагӀйола ха Наьсарен района «Ленина никъ» яхача газета редакце къахьегаш яьккхай цо. Дувцаш долча газета керттера редактор волаш, шийтта шу ха яьккхар цо [1].
Кхоллам
Духхьал журналиста жанрашца къахьийга Ӏацар Хасолта Микаил, цкъаза цо дора йоазанхой жанраш кӀийленга яда йоазош а. Цу тайпара цун цхьа йоазув дийшад аз, из я «Сурхо тӀара гумманист» яха повесть [1].
Сийлахь-воккхача эрсий поэта Михаил Юрьевича Лермонтова «Шалта» яхача байтагара дӀайолаяьй цо из:
«Болата са шалта, еза хьо сона,
Са новкъост сийрда, ша санна шийла.
Гуржечо, уйла еш, яьй хьо пхьена,
Черсечо тӀема иръяьй хьо хийла.
Хьо наькъахо я, меттаза новкъост,
Масал луш сец хьо лоамарой хьаьшка:
Со а хувцалургвац, хьахинна йост,
Хургва хьо санна, волаш мо аьшка».
Повесть арайоал 2002 шера. Цун дукхал эзарнега дӀакхоачаш яр.
Наьсарен районни газете болх баьчул тӀехьагӀа, цо дакъа лаьцар Шолжа районера газет хьадеча балха юкъе, цул тӀехьагӀа МагӀалбик-ГӀалан газет хьадеш а къахьийгад цо, «Сердало», «ГIалгIайче» яхача газетий редакцешка болх беш хиннав [1].
Дезал
ВоккхагӀвола воI Мухьмад йӀаьххача хана къахьегаш хилар дас болх баьча «Ленина никъ» яхача газета корреспондент волаш, цул тӀехьагӀа МагӀалбикерча «Заманхо» яхача кагирхой газета керттера редактор, «ГӀалгӀайче» яхача газета редактора заместитель хилар цох [1]
Микаила шоллагӀвола воI Руслан а дика вовзаш ва гӀалгӀай республике, из ва Базорканаькъан И. цӀерагӀча драматически театра актёр, ГӀалгӀай Республикан гӀорваьнна артист. Цо ловзаяьй бе-беча турпалий йовхьаш, цо дакъа лаьцад Н. Гогола «Ревизор», Р. Ибрагимбекова «Ханума», Чахканаькъан СаIида «Асхьаб Бендер», Боканаькъан Ахьмада «ЦӀий кхайк» («Беке къонгаш») яхача а кхыча а спектаклашка [1]
Вахара чаккхе
Хасолта МикIаьил карарча хана воацаш ва, из кхелхав 2009-ча шера маьтсела бетта 14-ча дийнахьа.
СовгIаташ, толамаш
Из вар ГӀалгӀай Республикан культуран гӀорваьнна болхло, иштта цунна еннаяр «КарагӀдаьннарех» яха вай республикан керттера орден [1].
Белгалдаккхар
ТӀатовжамаш
- Ӏарчакханаькъан Сали. Къоалам 1о ца буллаш, чакхваьнна саг (гӀал.) // «Сердало» : газет. — 2023. — 9 наджгоанцхой.