Чоалхане предложени
Чоалхане предложени (я) (эрс: сложное предложение) — шин е дукхагӀча цхьалхача предложенех латта предложени. Чоалхане предложени бӀарчча синтаксически оттам болаш хул.
Чоалхане цхьанкхийтта предложени
Чоалхане цхьанкхийтта предложенеш шин е дукхагӀча лоӀамеча доакъоех латт. Уж доакъош шоайла дувзалу цхьан маӀанцеи, хоттаргашцеи, е интонацеца. Цун доакъош синтаксически лоӀам болаш да. Масала: Малх лоамашта тӀехьашкара хьалбаланза бар, хӀаьта бийсанна шелъенна сигале бос бахача санна хеталора. Ер предложени шин лоӀамеча доакъоех латт. Шаккхе а дакъа къаьста предложенеш санна лела йиш йолаш да. Царна юкъера бувзам хоттаргаца белгалбоал. Цу тайпарча предложене доакъош хотташ цхьанкхетара хоттаргаш лел, уж да: цхьабакъда, бакъда, хӀаьта, тӀаккха, амма, и, а, е, цул тӀехьагӀа ишт.кх.
Чоалхане цхьанкхийттача предложенера доакъош цаI вокханца маӀанца бувзам лелабеш хул. Масала: Шелвенна сомаваьлар БорагӀан, набарах воаллашехь когаш хьийкха Ӏобаьккхар цо тӀаилла юврагӀа. Укх предложене шаккхе дакъа цхьан замах хула дер белгадоаккхаш лел.
Укх предложене цхьа дакъа бахьани цох хьахиннари белгалдоахаш лел. Масала: Бер санна гергаенна улл из тхьовса гӀерташ, цхьабакъда шийлача михо эккхаяь наб тӀаягӀаца цунна. ХӀанз гӀораяь ухкача ушалашка гӀолла гӀар-тата доацаш тӀаьна йисте кхаьчар Ӏийса, хӀаьта шелденнача кулгашта дика доал далацар. Чоалхане цхьанкхийтта предложене доакъош хоттаргаш доацаш дувзалу, цига хӀара дакъа ший лоӀам болаш хеталу. Масала: Кхаь-биъ бетта тхьайса яьгӀа сомий бешамаш сомаювлаш латт, чӀонкий бордаш халла дийлад. Укх доакъоша шоай лоӀаме ши цхьалха предложени кхолла бокъо я. Масала: 1. Тхьайса яьгӀа сомий бешамаш сомаювлаш латт. 2. ЧӀонкий бордаш халла дийлад.