Балайнаькъан Iабдурахьмана Довхан
| Балайнаькъан Ӏабдурахьма́на До́вхан | |
|---|---|
| эрс: Балаева Доухан Абдурахмановна | |
| Ваь таьрахь | 12 оагӀой 1945 |
| Венна таьрахь | 1 аьтинга 2021 (75 шу) |
| БӀорахол |
 СССР →  Россе Федераци |
| Леладу гӀулакх | |
| Кхолламаш даь шераш | 1990-1995 шераш |
| Дебют | 1990 шу, роман «Мадина» |
Бала́йнаькъан Ӏабдурахьма́на До́вхан (эрс: Балаева Доухан Абдурахмановна) — гӀалгӀай йоазонхо, «Мадина» яха роман яздаьр я. Эггара хьалха цун кхоллам могабаьр ва Байсаранаькъан Идрис.
Биографи
Дешар, болх
Балайнаькъан Довхан яьй 1945-ча шера оагӀой бетта 12-ча дийнахьа. 1974-ча шера цо дийша йистеяьккхай ХӀирий паччахьалкхен университета экономикан факультет. 1974-ча шера денз 1986-ча шерага кхаччалца цо болх баьб товаровед йолаш «Рособувьторг» яхача хӀирий базара предприяте. 1988-ча шера денз 1992-ча шерага кхаччалца цо болх баьб дохкаш долча хӀаман дикалга хьожаш йола паччахьалкхен инспектор йолаш ХӀирий госторгинспекце [1].
Кхоллам
Довхана кулгаца яздаь дола «Мадина» яха роман эггара хьалха бӀаргадайнар, тахка́р ва Байсаранаькъан Идрис. Идриса могадарца кинижка арадаьннад дукха ца говш. Романа тӀа дувцаш дола хӀама 70-90 шерашка боккъонца хинначунна тӀатовжаш яздаь да.
Кхолламгахьа аз керте увттадер да — сай къаман вахаре хинна бакъдар хьахьокхар: цун вахар, Ӏадаташ, эздел, хьинар, низ. Сайна моггача тайпара, деша низ дӀакхачарга хьежжа, со хьож цар мехкахой дага латтар, вахаре дар долчча тайпара хьахьокха— Балайнаькъан Довхан
[1].
1992-ча шера хӀирашца хинна къовсам бахьан долаш из ший боахамах яьннай. Цу юкъа дайнад цо яздаь, арахецанза дола романаш. ДагадоагӀачох цо юха меттаоттадаьд ше мел дайнача йоазонах ах дакъа. Йистедаккханза хиннад «Овлаш» (эрс: Корни) яха роман. Цох дисад «Бицбенна никъ» (эрс: Забытая тропа) яха хьалхара дакъа[1].
«Мадина» яхача роман тӀеххьа, 1995-ча шера «Эхо запретной любви» яха кинижка арадаьннад[1].
Арахийца дола кинижкаш
• Роман «Мадина». Шолжа-ГӀала. 1990 шу
• Роман «Эхо запретной любви». Москва. 1995 шу
• «Бицбенна никъ» (эрс: «Забытая тропа). Москва.1995 шу
• Роман «Мадина». Москва. 2009 шу
• Роман «Мадина». Шолжа-Г1ала. 2011 шу[1].
Кхалхар
Балайнаькъан Довхан кхалхай 2021-ча шера аьтинга бетта 1-ча дийнахьа[1][2].
Белгалдаккхар
- ↑ 1 2 3 4 5 6 Патиев, 2022, оа. 28.
- ↑ Умерла автор романов «Мадина» и «Эхо запретной любви» Доухан Балаева / Ингушетия, 1.06.2021
Литература
- Патиев Я. Писатели Ингушетии / Сост. проф. И. А. Патиев. — Ростов-на-Дону : «Южный издательский дом», 2022. — 28 с.
- ГӀазданаькъан А. Расплата неминуема // Сердало : лустам. — 1997. — 5 апреля.