Кхоартой Ӏаьлий Ӏамархан
| Кхоартой Ӏаьлий Ӏамархан' | |
|---|---|
| эрс: Картоев Амерхан Алиевич | |
 | |
| Ваь таьрахь | 15 оагӀой 1951 |
| Ваь моттиг | Казахехье |
| Кхелха таьрахь | 1999 |
| Кхелха моттиг | |
| БӀорахол |
 Россе Федераци |
| Леладу гӀулакх | гӀишланхо |
Кхоартой Ӏаьлий Ӏамархан (эрс: Картоев Амерхан Алиевич; 15 оагӀой 1951, ГІазакхстане — 1999, Те́вар[d]) — ГӀалгӀайчен гӀишланхо, бизнесмен.
Биографи
Кхоартой Ӏамархан ваьв 1951-ча шера оагӀой бетта 15-ча дийнахьа Кхоартой МурцаӀалий Ӏаьлийи Цхьорой Къоасе Хадчатеи дезале. Цар 12 дезалхо хиннав, царех ши бер кхелхад.
Дешар
1969-ча шера цо дийша йистеяьккхай Шолжа-ГӀалий тӀара № 56 юкъера ишкол, тӀаккха деша эттав академика Миллионщикова цӀерагӀа йолча Шолжа-ГӀалий тӀарча мехкдаьттан института «Промышленнии бӀорахойи гӀишлош яр» (эрс: Промышленное и гражданское строительство) яхача факультете[1].
Болх
Дийша ваьнначул тӀехьагӀа ше дӀахьожаварах Ӏамархан Ижевске вахав, «Стан 200» яха Духьалъоттама министерствон йоккха предприяти йоттара духьа. Цу балхо говзалагахьа шаьрваьв из, институте Ӏомадаьр дӀачӀоагӀдаьд цо цунца[1].
Оттаяь балха ха чакхъяьнначул тӀехьагӀа из юха цӀавенав Нохч-ГӀалгӀайче, дӀахо цо болх баьб ПМ-105 тӀа прораб волаш, тӀаккха Нохч-ГӀалгӀай АССР Ремстройтресте болх беш хиннав[1].
Из болх йистебаьккхачул тӀехьагӀа, 1980-ча шерашка Казахехьа вахав 1979-ча шера хьайийлача Тенгизе мехкдаьтта, газ йоаккхача метте. Цхьа ха яьннача гӀолла цо мехкара болхлой а ӀотӀабигаб цига. Цо кулгалдеш промышленни зона хьайийлай, цул совгӀа болх бе йолаяьй керда яьнна оборудовани чуйола асфальтобетонни завод. Цо кулгалдеш, болх беш хиннав Кульсарера 300 говзанча.
1988-ча шера Ӏамархан Шолжа-ГӀалий тӀа юхавенав. Цу шера Ӏаьдало бизнес лелае пурам денна хиннад на́ха́. Цу хана «Мосглавснабо» коммерческеи базареи юкъарченаш хьайийлай Москва-КӀала, цудухьа Кашире йоаллаш хиннача цу юкъарченех цхьаннена тӀагӀолла Ӏамархана Шолжа-ГӀалий тӀа а филиал йийлай.
1980-гӀа шераш йистедоалача хана, цун зӀамагӀа волча вошас хьайийлай «Труд» яха кооператив. Ши воша цхьана болх бе волавеннав. Цар вӀаштӀехьаяьккхай гӀишлош ергйолаш 13 моттиг, ийцай техникахи транспортахи лоархӀа 57 хӀама, тайп-тайпарча Республикан объекташка гӀишлонхой балхаш а наькъашцара балхаш а деш хиннаб. Нохчий мехка 1990-ча шерашка тӀом хьайначул тӀехьагӀа болх бе́ха́б, цул совгӀа балха гӀирс лочкъабаь хиннаб[1].
Дезал
1989-ча шера цо саг йоалаяьй. Цун сесаг хиннай Ӏарчакханаькъан Беслана Люба. Цо Нохч-ГӀалгӀай паччахьалкхен университет яьккхай. Ӏамархан кхалхача хана, Любай 35 шу даьнна хиннад, йоккхагӀйола йиӀиг Марем бархӀ шу даьнна мара хиннаяц, воӀ ИбрахӀим 6 шу даьнна, воӀ Мухьмад 4 шу даьнна, зӀамагӀйола йиӀиг Ӏайшет ши шу даланза хиннай[1].
Валар
1999-ча шера Те́вара областе догара́ ваха́ча наькъа тӀа хиннача хатарах веннав Ӏамархан[1].