Аьлданаькъан Ӏалима Руслан

Аьлданаькъан Руслан
БӀарчча цӀи	Аьлданаькъан Ӏалима Руслан
Ваь таьрахь	6 лайчилла 1973(1973-11-06) (52 шу)
Ваь моттиг	Караганда, Казахий ССР
БӀорахол	→  Россе Федераци
Дешар	Буро тӀара А. Джанаева цӀерагӀа йола суртанчала училище

Тохкаш нийсбаь лустам

Аьлданаькъан Ӏалима Руслан (эрс: Эльдиев Руслан Алимович‎; 6 лайчилла 1973, Караганда^[d]) — россе гӀалгӀай суртанча. ГӀалгӀай Мехка халкъа суртанча ва. Эрсечен суртанчий юкъарлон доакъашхо ва. ГӀалгӀай Республика герб дагадехар а, диллар а ва.

Биографи

Аьлданаькъан Руслан ваьв 1951 шера лайчилла бетта 6-гӀча дийнахьа Казахий ССР Караганде.

1973 шера М. Джемала цӀерагӀа йолча Селий мехкарча суртанчала училище деша этта хиннав Руслан. ТӀехьагӀа дешар дӀахо дӀадихьад Буро тӀарча А. Джанаева цӀерагӀа йолча суртанчала училище живопись Ӏомаеча отделене. 1977 шера чакхадаьккхад цигара дешар.

Цу шера МагӀалбике хьайийлача ГӀалгӀай мехка хьалхагӀарча берий суртанчала ишколе директоралла эттав. Из хьаеллара духьа а дуккха къахьийга хиннад Руслана. Цига болх беча юкъа массехк къона суртанчий ноахал кхедаьд цо. Иштта, цу юкъа хиннаб Руслана белхий хьалхара гойтам а.

1981—1990 шерашка цкъа хьалха Тамбовскии, тӀаккха Орловскии областашка ваьхав тайп-тайпара белхаш деш. Цу юкъа Руслана кхоллама никъ сеца хиннаб.

1990 шера ший мехка цӀавеча кхоллам юха болабаьб. Духхьал цу хана эггара чӀоагӀагӀа дегӀабенаб цун из. ГӀалгӀай мехка а тайп-тайпарча россерча пхьешка хиннад Руслана белхий гойтамаш: Уфе, Ростове, Краснодаре, Ставрополе. Цул совгӀа дунен къамашта юкъерча гойтамий а доакъашхо хиннав.

Аьлданаькъан Руслан дакъа лоацаш ва «Эрсечен суртанчий юкъарло» яхача ерригроссе кхолламхой юкъарлен организацен ГӀалгӀай отделенен чухьа. ГӀалгӀай Мехка паччахьалкхен гойташ йолча исбахьалений музее дад цун белхаш, иштта къаьстта йолча коллекцешка а дад Россеи, доазал дехьеи.

Дезал

Саг йоалаяь ва, бераш да.

ЦӀихеза белхаш

Руслана эггара цӀихезагӀа, гӀорбаьннагӀа болх ба ГӀалгӀайчен герб. Бакъда, из боацаш кхы а да, масала:

• «ЦӀей» («Праздник»)
• «ХьоалчагӀа» («Свадьба»)
• «ВӀовнашка» («Вовнушки»)
• «Пхьугой гӀала»
• «Хамхи»
• «ТӀумхи»
• «Последний защитник Брестской крепости»
• «Спецпереселенцы».

Хобби

Руслан ший керттера гӀулакх леладарал совгӀа дукха дезаш ва бешлелаяр а зизашлеладар а.

Алар

• «Сона хетаргахьа, суртанча — гаьнна хьалхашкахьа хьежаш а кхычунна зе ца могар зе ховш а вола саг ва».

Ший меттала (эрс.)

«Мне кажется, что художник — это человек, смотрящий далеко вперед и умеющий видеть то, что не способен разглядеть другой».

• «Дуккха хӀама зувц вай: бӀаргаш да вайга, амма гац вайна, лергаш да вайга, амма хазац вайна. Сердало Ӏенах къоастаде магац, бесаши беса Ӏенаши зувц, кепаш къоастайиц, хӀаьта эггара новкъагӀа — Дала кхелла вайна гонахьара хозал гац вайна. Из хозал го могаш вола саг ва суртанча, вӀалла цун сурт дила ца хой а».

Ший меттала (эрс.)

«Мы многого просто не замечаем: имеем глаза, но не видим, имеем уши, но не слышим. Не можем отличить свет от тени, не замечаем цвета и оттенки, не различаем формы и, что самое обидное, не видим окружающую нас красоту, которую создал Бог. Вот тот человек, который имеет способности видеть всю эту красоту, и есть художник, даже если он совсем не умеет рисовать».

Белгалдаккхар

ТӀатовжамаш

• М. Оздоева. Успеть раздать при жизни : [рус.] : ст. // «Ингушетия». — 2019. — 25 ноября.
• Л. Алмазова. История одной картины. : [рус.] : ст. // Государственный музей изобразительных искусств Республики Ингушетия (официальный сайт). — 2022. — 9 июня.
• Изобразительное искусство Ингушетии : илл. изд. / сост. Л. А. Алмазова. — Министерство культуры Республики Ингушетия, Государственный музей изобразительных искусств Республики Ингушетия. — Ростов-на-Дону : Изд. центр «БИБОП», 2020. — С. 231. — 1000 экз.