Зортанаькъан Руслана Iамархан
| Дзо́ртанаькъан Русла́на Iамарха́н | |
|---|---|
| эрс: Дзортов Амерхан Русланович | |
 | |
| Ваь таьрахь | 11 тов 1989 (35 шу) |
| Ваь моттиг |
 СССР Наьсаре |
| БӀорахол |
 Россе Федераци |
| Леладу гӀулакх | хоамбоаржабархо, хьокхаченаш дIакхухьар, диктор |
Дзо́ртанаькъан Русла́на Ӏамарха́н (эрс: Дзортов Амерхан Русланович) — ГӀалгӀайчен хоамбоаржабархо, хьокхаченаш дӀакхухьар, диктор, шеф-редактор. Останкино телевиденеи радиовещанеи института дешархо. Театреи кинони креативни индустрийи юкъарчен кулгалхочун когаметтаоттар.
Биографи
Дзортанаькъан Ӏамархан ваьв 1989-ча шера тов бетта 11-ча дийнахьа Наьсаре.
Дешар
2011-ча шера Ӏамархана яьккхай Тюменера паччахьалкхен университет, паччахьалкхени бокъони институт «Юриспруденция» («Гражданское право») говзалах. 2014-ча шера яьккхай Москвера Останкино телевиденеи раддиовещанеи институт, «Хоамбоаржабар» говзал караерзаеш. 2019-ча шера Москве цо дийша йистеяьккхай Россе паччахьалкхен гуманитарни университет «Хоамбоаржабар» яхача говзала «Телехоамбоаржабар» даькъе.
12 шерал совгӀа цо телевидене болх баьб корреспондента, редактора, шеф-редактора дарже. Дукхача хьокхаченашка цо хьалхале лелаяьй. Тайп-тайпара концерташ, вӀашагӀкхетараш дӀакхихьад.
Болх
2011—2014 шерашка Ӏамархана болх баьб ПТРК «ГӀалгӀайче» «Вести» яхача хоама программай корреспондент а дӀакхухьар а волаш. 2014-ча болх беш хиннав «Ангушт» хоамийи салоӀамеи программашка хьалхе дӀакхухьар волаш. 2014—2015 шера денз из къахьегаш хиннав ГӀалгӀай Мехка Доалчен пресс-службе хоамбоаржабара говзанча волаш. 2015-2016-ча шерашка ГӀалгӀайчен Товшхала министерствон искусствон отделе болх баьб цо. 2016-ча шера цо къахьийгад «Зокх» яхача театреи, кинои, телевиденеи студе. Хоама-тохкама редакце шеф-редактор волаш, 2017—2018 шерашка цо болх баьб «Магас» яхача Къаман телерадиокомпане. 2015—2017 шерашка хьалхе дӀакхихьай «Новости-24» яхача программай праймови передачашка. 2013-ча шереи, 2016-ча шереи, 2017-ча шереи цо дӀакхьийхьай «Диалог с народом» яха мехкдас къаманца къамаьл дувца хьокхаче. Хоамбоаржабара дарже говзал лакхъяларца Ӏамархан лакхвеннав. ДӀахо цо болх баьб АО «Первый канал» доазон тӀа, ток-шоу редактор волаш. 2022—2023 шерашка из болх беш хиннав театреи, кинони, креативни индустрийи центре исбахьален кулгалхо волаш. 2022—2024 шерашка «Олимп» яхача лицей-юкъарчерча берий беша хьехархо волаш а болх баьб Ӏамархана. 2020—2023 шерашка из хиннав «Магас» яхача Къаман телерадиокомпане «Главное» яхача юкъара-политикан передаче хьалхе дӀахьош. 2019—2023 шерашка цо кхы а тематически программай керттерча редакце шеф-редатора дарж леладаьд. 2024-ча шера денз цо бувзам лелабу «Триикс Медиа» яхача Санкт-Петербургерча Россе продюсерски компанеца. Из дакъа лоацаш хиннав «5 канала» даьккхача «Наш спецназ», «Условный мент», «Великолепная пятерка» яхача сериалашка. 2025-ча шера денз Ӏамархан ва Театреи, кинои, креативни индустрийи юкъарчен кулгалхочун когаметтаоттар[1].