Лаьнанаькъан Ахьмада Марем
| Лаьнанаькъан Ахьмада Марем | |
|---|---|
| эрс: Льянова Марьям Ахмедовна | |
 | |
| Ваь таьрахь | 10 бекарга 1943 (82 шу) |
| Ваь моттиг | ГӀалме шахьар |
| БӀорахол |
 СССР →  Россе Федераци |
| Леладу гӀулакх | оазархо |
| Жанр | оазарле |
| Кхолламий мотт | эрсий мотт |
| Дебют | 14 шу даьннача хана |
| СовгӀаташ | ГӀалгӀай Мехка дукха дика хӀамаш карагӀдийна хьехархо, Россе йоазонхой юкъарлон доакъашхо |
Лаьнанаькъан Ахьмада Маре́м (эрс: Льянова Марьям Ахмедовна) — ГӀалгӀайчен оазархо, Дукха дика хӀамаш карагӀдийна хьехархо, Россе йоазонхой юкъарлон доакъашхо.
Биографи
Лаьнанаькъан Марем яьй 1943-ча шера бекарга бетта 10-ча дийнахьа Нохч-ГӀалгӀай АССР ГӀалме шахьаре Редант яхача юрта цӀихезача паччахьалкхен болхлочун, гӀалгӀаех хьалхарча дукха дика хӀамаш карагӀдийнача инженер-гӀишлонхочун Лаьнанаькъан Сосланбика Ахьмадеи инарала Байсаранаькъан БӀунахочун виӀий йиӀий Мамиланаькъан Ӏайшетеи дезале.
Цун да-нана яхь йолаш нах хиннаб. Лаьнанаькъан Ахьмад Москве дийша хиннав, 30-ча шерашка Таджикистане электростанци («Чубекстрой») йоттара хьалхалаьттав. 40-ча шерашка цо болх баьб ГӀиргӀизстане Доккха Чуйски канал доттача кулгалхо волаш.
Цунна нийсса хиннай Марем нана а. Деррига цӀа леладеш хиннад Ӏайшета. Марем яь шу доалаш, мехках даьккхад гӀалгӀай къам, цу юкъа из нана йоацаш йисай. ГӀалгӀай мехкал арахьа нана йоацаш кхер хилар Марема.
Кавказе я́ха цӀаеначул тӀехьагӀа, из деша эттай Нохч-ГӀалгӀай паччахьалкхен хьехархой институте, 1964-ча шера цо из йистеяьккхай тӀехдика. Эрсий меттеи литературани хьехархо йолаш, цо 30 шера болх баьб тайп-тайпарча ишколашка[1]. 1992—1996 шерашка Марем болх беш хиннай ГӀалгӀайчен мехкдаь хьехамча йолаш[2]. Из я Россе къаман просвещене отличник, ГӀалгӀайчен дукха дика хӀамаш карагӀдийна хьехархо, Россе йоазонхой юкъарлон доакъашхо[3].
Кхоллам
Ший хьалхара байт цо язъяьй 14 шу даьннача хана[4]. Цун байташ кепаетташ арайийнай 1957-ча шера денз. Цун хьалхара «И это таинство стиха» яха байтий гуллам арабаьннаб 2001-ча шера, цунна тӀеххьа 2002-ча шера арабаьннад «Перо, которым правит муза» яха кинижка. 2005-ча шера — «Радуга: стихи для детей», «Лира мечты», 2007-ча шера — «Хержараш» («Избранные стихи»), «Это голос таинственной лиры». ГӀалгӀашта юкъе из хьалхара я «Антология литературы народов Северного Кавказа» яхача гуллама юкъебахачарех (2006 шу), хӀаьта «Антология ингушской поэзии. Век XX» яхача оазарлен антологена юкъеяхай 2006-ча шера[5]. Цо язъяь «ГӀала» («Башня») байт ГӀетагӀазанаькъан Мухьмада Ӏайнай цӀихезача иллен ларде улл. Цо цу тӀа ювц гӀалгӀай къало лайна хало, гӀала теш йолга гойташ. 1978-ча шера денз из хӀама гуш яц бӀаргашта, цунна С. Федорова цӀерагӀа йолча дарбанче йиъ операци яьй бӀаргашта. Иштта хало тӀалаьттаяле а, из яздеш хиннай, юха ца соцаш[6].
Белгалдаккхар
- ↑ К 80-летию со дня рождения корифея ингушской поэзии Марьям Льяновой
- ↑ Писатели и поэты республики Льянова Марьям Ахмедовна (1943)
- ↑ В Ингушетии прошел поэтический вечер, посвященный 80-летию известной поэтессы Марьям Льяновой
- ↑ С юными жителями Берд-Юрта говорили о творчестве Марьям Льяновой
- ↑ Ингушская Мадонна — поэтесса Марьям Льянова
- ↑ Гордость Ингушетии – Марьям Льянова