МутаӀалам
МутаӀа́лам (хьадаьннад Ӏар. مُتَعَلِّم [мутаӀаллим] — Ӏомавешвар, дешархо, Ӏами яхачох) — хьужаре деша ва́гӀаш вале а, е кхычахьа дале а, бусалба ди Ӏомабеш вола саг.
ГӀалгӀашкахьа
Советий Ӏаьдал тӀада́лехь ГӀалгӀай Мехка мутаӀаламаш хьужаренашка бахаш хиннаб дукха. Царна напагӀа лоаттадеш хиннад юртарча наха цхьана: аьттув болчо сурсат луш а, ахча луш а. Советий союз йохарца арахьа дӀабаха аьттув хьахиннача гӀоне юртарча наха ахчаш вӀашагӀ а детташ де́ша ухийташ хиннаб мутаӀаламаш. ХӀанз а каст-каста юрташа напагӀа лоаттадеш бахаш мутаӀаламаш хул.
Ӏарбашкахьа
Ӏарбий меттала хӀанз мутаӀалама маӀане леладеш дар кхыдола дош да — «طَالِبُ الْعِلْمِ» [тӀоалиб аль-Ӏильм]. Цун маӀан да Ӏилма дӀадехашвар — цунца гойт Ӏилма эцара (Ӏомадара) духьа къахьега дезалга — из дӀадеха дезалга, ши-шегӀа хьатӀа ца доагӀаш.