Хьужаре
Хьужаре (я) (хьадаьннад Ӏар. حُجُرَة яхачох, эрс: медресе хьадаьннад Ӏар. مَدْرَسَة яхачох) — бусалба дешара дешарче я. Хьужаре багӀарех мутаӀаламаш оал.
ЦӀи
Хьужаре яха дош доагӀа Ӏарбий حُجُرَة яхача дешах — цар меттала цун юххьанцара маӀан цӀалг да (эрс: комната).
ГӀалгӀай Мехка
ГӀалгӀай Мехка хьужаренаш йола дукха ха я. Николай паччахьа хана дуккха хьужаренаш хиннай, цига деша багӀаш Ӏаьдала ишколашка багӀачул массехказза дукхагӀа нах хиннаб. Хьужаренашка да́гӀаш хиннад дарс долча хана хьадоагӀаш-чудолхаш хинна бераш а, хьужаренна гаьна доацаш Ӏече а еш юрто напагӀа лоаттадеш ба́ха мутаӀаламаш а. Хьужаренаш дукхагӀча даькъе е маьждиге хиннай еш, е маьждига йисте гӀишло йогӀаш хиннай цу гӀулакха́. Деша кӀаьнкаш а йиӀигаш а ухийташ хиннаб, уж цига КъорӀа деша Ӏомалургболаш а, вешта динах цхьацца хӀама Ӏомадергдолаш а. КӀоаргагӀа дешараш бусалба Ӏилмаш а дешаш гаьна бувлаш хиннаб Ӏарбий мотт Ӏомабеш.
Советий Ӏаьдал тӀаденачул тӀехьагӀа Ӏаьдала ишколаш хьа а елаш, хьужаренаш дӀакъовлаш хиннай, цар чу хьехаш бола дийша нах кулакаш ба а оалаш Сибаре Ӏобохийташ хиннаб. Ӏаьдала ишколашка бераш ухийташ хиннадац на́ха бераш кераста хилар кхераш, къаьстта йиӀигаш ихийтаяц. Бусалба ди хьехар къайлагӀа деш хиннад денгара ди доалаш цӀенгара цӀенга а болхаш. Цкъаза Ӏаьдал чулелхаш а хиннад цу тайпарча хьужаренашка хьехарашта таӀазар а деш. Цу тайпара хьал лаьттад гӀалгӀайи нохчийи мехках баххалца.
Советий союз ехачул тӀехьагӀа хьужаренаш юха болх бе йолаеннай.
Арахьа дешар
Селашкахьа дукха хана денз дукха хьужаренаш хиннай. ГӀалгӀай мехкара мутаӀаламаш каст-каста ухаш хиннаб ДаьгӀасте Ӏилма эца. Цул совгӀа Гаргарча Малхбоалехьа деша ихаб хьалха Шаьме а: БагӀдаде, Дамаске, Байтулмакъдисе. Советий Ӏаьдал латтача юкъа́ арахьа Ӏилма эца аьттув хиннабац. 1992-ча шера доазонаш хьадийлачул тӀехьагӀа гӀалгӀай мутаӀаламаш арахьа дӀаухаш хиннаб деша: хьалха хиннача моттигаш тӀа иштта дукхагӀа Мисаре а, СаӀуди Ӏарбий мохк а ӀотӀакхийттаб.