Муцолганаькъан Салмана Рая

Муцолганаькъан Салман Рая
эрс: Муцольгова Рая Салмановна
Ваь таьрахь	1943(1943)
Ваь моттиг	Наьсар-Керте, Нохч-ГӀалгӀай АССР
Венна моттиг	14.07.2020
БӀорахол	СССР →  Россе Федераци
Леладу гӀулакх	хоамбоаржабархо

Муцо́лганаькъан Салма́на Ра́я́ (эрс: Муцольгова Рая Салмановна) — гӀалгӀай хоамбоаржабархо, Эрсечен хоамбоаржабархой юкъарлон доакъашхо, «Сердало» газета корреспондент я.

Кхери дешари

Рая яьй 1942-ча шера маьтсела бетта 9-ча дийнахьа Наьсар-Кертерча Муцолганаькъан Салманеи Олмазнаькъан Соняйи дезале. Нана дийша хиннаяц, бакъда дас НКВД школа яьккха хиннай, цо болх баьб цу лостамагӀа арахьа — Таганроге. Сибарера гӀалгӀай цӀабаьхкачул тӀехьагӀа, из деша яьгӀай Наьсарерча № 2 йолча юкъерча школе, цига яьккхай цо бархӀ класс. ТӀеххьара ши класс Шолжа-ГӀала тӀа яьккхай. Цул совгӀа кхы а кхо дезалхо хиннав Салмана, къонгаш Аюп, Йоакъап, йоӀ Аза. Школе яьккхачул тӀехьагӀа МГУ хоамбоаржабархой факультете деша отта аьттув баьннаб цун, бакъда из чакхъяккхаяц цо: нана, цхьацца бахьанаш оттарца, цхьаь йиса хиннай; цунца саг хила везаш хиннад гӀулакх. Москвера, нанна юхе хилар духьа, Шолжа-ГӀала тӀарча Нохч-ГӀалгӀай паччахьалкхен хьехархой институте хьахьожаяйтай цо ше, кхоалагӀча курсе денз, цӀагӀа дешаргдолаш. Филологе факультет я цо заочно яьккха́ хиннар.

Болх

Ше цӀаеча денз, «Сердало» газета редакце хоамбоаржабархой болх беш хул из. Цу хана цига къахьегаш хиннаб къаьна хоамбоаржабархой Лаьнанаькъан Керам-Хьажий Мустафа, Къоастой Махьмада Башир, Пхьилекъонгий Аьдалгире Ахьмад, Маькенаькъан Абукара Асхьаб, Котанаькъан СаӀадалий Султангири, Пхьилекъонгий Идрис, Аьгенаькъан Хьамид, Боканаькъан ХӀаме Ахьмад, кхыбараш. Цул тӀехьагӀа из маьре йода. Рая ех Овшанаькъан Хасолта́ Къамбулата́.

Маьре яхачул тӀехьагӀа, Салмана Рая балха эттай «Ленина никъ» яхача шахьарерча газета редакце. «Сердало» газета редакцера, «Ленина никъ» яхача редакце балха дӀахьожаю аьнна техадар цунна приказ. 1966-ча шера денз, цига болх беш хиннай из. Цул совгӀа, Наьсарен шахьара радиопункт лелаяьй цо. Шахьаре мел дола кердадараш довзийтар цо Ӏуйранна 6-7 сахьат даьлча, алхха наьсархошта лаьрхӀа деча радиохоамашка гӀолла.

ДӀахо дӀайодача хана, цӀен паргӀато енай царга. Шоай квартира ковнаца хийца а хийце, Наьсарерча возгален гаьна боацаш, баха бахаб уж. Цу коа ши воӀи пхи йоӀи кхедаьд цар.

Из хиннай СССР, цул тӀехьагӀа Эрсечен хоамбоаржабархой юкъарлон доакъашхо, къахьегама ветеран, нана-турпал.

Ялар

Муцолганаькъан (Овшанаькъан) Салмана Рая кхелхай 2020 шера кӀимарса бетта 14-ча дийнахьа.

Белгалдаккхар

ТӀатовжамаш

• Ӏарчакханаькъан Сали. Нах безаш ваьхар, сий долаш хул (гӀал.) // «Сердало» : газет. — 2022. — 9 оагӀой.