Экажанаькъан Мухьмада Марина
| Экажанаькъан Мухьмада Марина | |
|---|---|
| эрс: Экажева Марина Магометовна | |
 | |
| Ваь таьрахь | 4 маьцхали 1971 (53 шу) |
| Ваь моттиг |
 СССР |
| БӀорахол |
 Россе Федераци |
| Леладу гӀулакх | артист, мукъамхо |
Эка́жанаькъан Му́хьмада Мари́на (эрс: Экажева Марина Магометовна) — ГӀалгӀайчен иллиалархо, оазархо, мукъамхо, ГӀалгӀай Мехка дукха дика хӀамаш карагӀдийна артист.
Биографи
Экажанаькъан Марина яьй 1971-ча шера маьцхали бетта 4-ча дийнахьа. Цун кхо йишеи ши вошеи ва. Нана юхьерча классашка хьехаш хиннай, хӀаьта да чкъаьрий доахача, чарахьал леладеча юкъарлон тхьамада хиннав. Духхьашха из деша яхай Наьсарерча № 3 йолча ишколе. 1981—1986 шерашка цо дийшад мукъама ишколе, Маринай хьехархо хиннай Йовлой Рая. 1984—1986 шерашка Маринаc «Аьрзи» ансамбля концертмейстер йолаш къахьийгад, из цу хана кхойтта шу даьнна мара хиннаяц. 1986—1990 шерашка цо дийша йистеяьккхай Гуржехье мукъама училище халкъа гармоникай классах. Деша отташ дӀалуш йола экзаменаш тӀехдика еннай, Маринас цхьанне мара пхиъ яьккхаяц. Цига цо дийшад Величко Л. С. классе. Мукъамхочун говзалагахьа цо хьехарах из совъяьннай.
1990-ча шера Марина ший мехка цӀаенай, балха эттай берий мукъама ишколе. Иштта «ГӀалгӀайче» яха ансамбль вӀашагӀйоллаш керттера дакъа лоацаш хиннай из.
1993-ча шера цо болх баьб «ГӀалгӀайче» яхача паччахьалкхен телерадиокомпане вокалист-иллиалархо, оазархо йолаш. 1994-ча шера Марина маьре яхай. Тоъал ха яьккхай цо кхоллама болх юхасоцабаь.
2021-ча шера из болх бе араяьннай «Магас» яхача товшхал дегӀайоалаяра центре. Иштта из болх беш я креативни индустрий центре. Цу центре чухь цо кулгалдеш я «Вокал» яха студи[1].
Маринай кхоллама́ юкъе дукха да къаманна хетадаь иллеш. Эггара хьалха гӀалгӀашта дег чу дижа́р, дагалоацама чухь сеца́р да Янданаькъан Хамарзий Джамалда дешашта тӀагӀолла даьккха дола «Хьо деттале, са дог» яха илли. «Са Даьхе» яхача илле чухь а Янданаькъан Джамалда мугӀараш дад. Иштта цӀихеза да «Да вала хьа, Зама» яха илли а. Тоъал ха а яьккха кхоллама болх юхасоцабаь, юха мукъамаш, иллеш кхолла йолаеннача хана даьккхад цо «Наьна дуӀа» яха илли. Иштта ГӀалгӀай паччахьалкхен 100 шу дузаш, цо даьккхад «Заман байракх» яха илли. Цун дукхача иллей ларде дийшад Йовлой Илеза, Тоачанаькъан Мухьаммада дешаш, иштта къонача оазархой Татренаькъан Исроапалеи СапраӀаланаькъан Микаьилеи байташ а[2].
Белгалдаккхар
СовгӀаташ
• ГӀалгӀай Мехка дукха дика хӀамаш карагӀдийна товшхала болхло