Ӏарпенаькъан Османа Хьажбикар
| Ӏарпенаькъан Османа Хьажбикар | |
|---|---|
 | |
|
| |
|
Наьсарерча райисполкоме физически культурах йолча комитета тхьамада
|
|
| 1955 шу | |
|
|
|
| Ваьв |
27 оагӀой 1935 ТӀой-Юрт |
| Веннав | 28 аьтинга 2011 (75 шу) |
| Дешар | Москвера паччахьалкхен юридически академи |
Ӏарпенаькъан Османа Хьажбикар (эрс: Осман Хажбикарович Арапиев) — парте болхло, юрист, паччахьалкхен болхло.
Ӏарпенаькъан Хьажбикар ваьв I935 шера оагӀой бетта 2I-ча дийнахьа ТӀой-Юрта. ГӀалгӀай къам Сибаре дигачул тӀехьагӀа яьккхай цо ишкол ГӀинбухьерча ГӀазакхстане Измайловка яхача юрта[1].
Вахара юхьиг
Хьажбикара ши шу даьннача хана, I937-ча шера, цун да вийннав герз дийтта. Из цу хана ТIой-Юртарча колхоза хьалхара тхьамада хиннав. Цу юкъа боабаьб цун даь вежарий а. Революци ялалехьа йоккха таро йолаш вахаш саг хиннав цун да, ше Макка ваха хиннав. Цунца дувзаденна хиннад вера бахьан а. Хьажбикара даь вахарах бола хоам дуккха тӀехьагӀа байзаб, СО АССР парте Обкоме болх беш волча хана. Даь юхь хьалхара бӀаргаяйнай цунна БӀорахой тӀема удостоверене тӀа латтача сурта тӀагӀолла. Из хинна ворхI шу даьнначул тӀехьагӀа Хьажбикар кхыча дезалашца цхьана, ГӀалгӀайи нохчийи мехках боахача хана, Сибаре Ӏовигав.
Дешар
Цо дийша йистеяьккхай Алма-Атера лорий училище, тӀехьагӀо I95I-I953 шерашка физкультурни техникум, из яккхарца из юкъевахав боксах йолча спорта говзачашта юкъе. ТӀаккха цо дийшад юристалла ВЮЗИ, хӀанзарча цу дешара моттигах циӀи йоаккх Москвера паччахьалкхен юридически академи.
Болх
Балха никъ болабеннаб 1955-ча шера.
1958-ча шера из хиннав Наьсарерча райисполкоме физически культурах йолча комитета тхьамада;
1959-ча шера — Наьсарен райкома комсомола инструктор;
1960-ча шера — Наьсарен комсомола райкома шоллагӀвола секретарь, «Ленин никъ» яхача газета редактора когаметтаоттар;
1962-ча шера — «Шолжа гӀала тӀара болхло» яхача газета корреспондент;
1967-ча шера — Наьсарен райисполкома тхьамада;
197I-ча шера — СО АССР прокуратуран воккхагӀвола тахкархо, цу шера — СО АССР набахташка тӀахьожам лелабеш вола воккхагӀвола гӀонча;
1986-ча шера — цунна хьожаяьй Советий Эскара подполковника цӀи;
1993-ча шера — ГӀалгӀай Мехка РФ арахьарча экономически бувзамах йолча министерствон тхьамада;
1995-ча шера — ГӀалгӀай Мехка РФ Президента викалалла аппарата керттера говзанча;
1997-ча шера — цунна еннай Россе Федераце 2 классах йола квалификаци.
Белгалдаккхар
ТӀатовжамаш
- Ӏарчакханаькъан Сали. Цох ала йиш яр, визза гӀалгӀа ва. Ӏарпенаькъан Хьажбикара вахара наькъах лаьца (гӀал.) // «Сердало» : газет. — 2022. — I9 I2.