ГӀалгӀай Мехка паччахьалкхен архива гӀулакх
| ГӀалгӀай Мехка паччахьалкхен архива гӀулакх | |
|---|---|
| Хьайийла таьрахь | 1993 |
| Директор | Тоачанаькъан Махьмуда ИбрахӀим |
| Моттиг | Магас, Горчханаькъан А. урам, 13 цӀ. |
| МазаоагӀув | archive06.ru (эрс.) |
ГӀалгӀай мехка паччахьалкхен архива гӀулакх (эрс: Государственная архивная служба Республики Ингушетия) — Магасе йоалла 1993-ча шера йилла Россе архива учреждени. ГӀалгӀайче хьакъаьстачул тӀехьагӀа хьахиннай, цкъарчоа ший фонд а йоацаш — из гулъеш лоадам бола дакъа лаьцар архива хьалха директор хинна МутаӀаланаькъан Хьажабийкара Темарлан ва.
Тархьар
1993-ча шера кӀимарса бетта 19-ча дийнахьа ГӀалгӀайчен президент хиннача Овшанаькъан Султана Руслана №227 йолча амарца ГӀалгӀай Мехка архив гӀулакха паччахьалкхен комитет вӀашагӀъеллай, тӀехьагӀа ГӀалгӀай Мехка Паччахьалкхен архива гӀулакх хьадаьд цох. Архив хьаеча хана ший каьхаш долаш ба́за хиннаяц цун: е Нохч-ГӀалгӀайчен архивах хӀама а кхаьча́ хиннаяц цунна, е архив лоаттае гӀишло а хиннаяц, е болхговзал йола болхлой а хиннабац[1].
Архив къахьегаш хиннай ГӀалгӀай Мехка тархьарах дола каьхаташ меттаоттадеш. 1997-ча шера архива директор волча тархьархочо МутаӀаланаькъан Темарлана къахьегарца Росархива коллегес лаьрхӀа хиннад Эрсечен массайолча федеральни архиваш ГӀалгӀайчен архива фонд вӀашагӀйолла гӀо де. Цу хӀаманна тӀагӀолла 1990-гӀа шераш чакхдоаллаш — 2000-гӀа шераш долалуш хиннача хана эзараш-эзараш каьхаташ шолхадаьхад юххера ГӀалгӀайчен тархьарах йолча архивалла этта́ долча[2].
2008—2010-ча шерашка ГӀалгӀайчен архива фонд меттаоттаярах йола региональни целевой программа тӀаийца хиннай, из чакхйоаккхаш боккха болх дӀабихьаб Эрсечен а цхьан даькхе Казахехьен а каьхаташ ксероксаца шолха а доахаш оцифровка а еш. Цу хана денз тайп-тайпара программаш йолх иштта шолхадоахаш каьхаташ[2].
2000-ча шерашка архива́ керда гӀишлош дӀаеннай Наьсареи Магасеи[3].
Кулгалхой
- 1993—1996: Чахкенаькъан Ахьмада Башир
- 1996—1999: МутаӀаланаькъан Хьажабийкара Темарлан
- 1999—2003: Куркъанаькъан Хьусена Марет
- 2003—2009: Котаганаькъан Мухьмада Мадина
- 2009—2014: Султиганаькъан Мухьмада Гирихан
- 2014—2016: Кхоартой Мусай Мухьмад
- ?—хӀ. х.: Тоачанаькъан Махьмуда ИбрахӀим
Белгалдаккхар
- ↑ Картоев, 2019, оа. 95.
- ↑ 1 2 Картоев, 2019, оа. 96.
- ↑ Картоев, 2019, оа. 97.
- ↑ О нас. Государственный архив Ингушетии. Хоам хьаийца таьрахь: 11.10.2024. Архиваци яьй 12.11.2024.
Литература
- Картоев М. М. Становление архивов и архивного дела Республики Ингушетия: от истории к современности // История и архивы. — 2019. — № 1. — С. 89—101.
ТӀатовжамаш
- archive06.ru (эрс.) — Государственного архива Ингушетии керттера мазаоагӀув
- Список фондов на 2022 год
