Дзовранаькъан Ӏабдул-Хьамида Танзила
| Дзовранаькъан Ӏабдул-Хьамида Танзила | |
|---|---|
| эрс: Дзаурова Танзила Абдул-Хамидовна | |
 | |
| Яь таьрахь | 12 саькура 1983 (43 шу) |
| Яь моттиг |
 СССР, МохтӀе ЖӀайраха шахьар |
| БӀорахол |
 Россе Федераци |
| Леладу гӀулакх | Ӏилманхо |
Дзовранаькъан Ӏабдул-Хьамида Танзила (эрс: Дзаурова Танзила Абдул-Хамидовна; 12 саькура 1983, МохтӀе, ГӀалгӀайче) — ГӀалгӀайчен Ӏилманхо, тархьархо, этнограф[1].
Биографи
Танзила яьй 1983-ча шера саькура бетта 12-ча дийнахьа ЖӀайраха шахьара МохтӀе. Цо дийша йистеяьккхай ГӀалгӀай паччахьалкхен университет. Танзилас болх бу Оахаранаькъан ЧхьагӀийй цӀерагӀа йолча Ӏилма-тохкама институте, иштта Т. Х. Малсаганаькъан цӀерагӀа йолча ГӀалгӀай паччахьалкхен мохктохкама музее[1].
2015-ча шера цо хьайийлай АНО «ГӀалгӀай тархьара-географически юкъарло «Дзурдзуки». «ИстИнг» яхача фертах кӀувсаш деча говзанчий юкъарчен тхьамада я 2019-ча шера денз[1].
2020-ча шера денз ГӀалгӀайчен суртанчий юкъарлон доакъашхо я.
Болх
2018-ча шера денз из къахьегаш я лоаме читаш гуладеш, экспедицеш дӀакхухьаш. Иштта Танзилас вӀашагӀтехад гӀаьрчош. 2018-ча шера денз из фертах кӀувсаш хьадеш я. «Ингушский национальный орнамент. ГӀалгӀай къаман гӀарчош» яха монографи арахийцад Танзилас[1]. 2024-ча шера маьцхали бетта РФ юкъарча палатан «Сообщества» форума баьча маьхах, региона эггара тӀехдолча 10 проекта́ юкъеяхай «ГӀалгӀай гӀаьрчӀош» яха проект.
Цо язбаь 50 совгӀа Ӏилман болх ба. Иштта ше дакъа лоацаш хиннай дукхача къамашта юкъерчеи ерригроссеи исбахьален гойтамашка. «Дзурдзуки» «Каменная летопись страны башен» яха гойтамаш дӀакхихьа́р я ГӀалгӀай Мехка.
2021-ча шера денз Дзовранаькъан Танзила керттера эксперт я «Молодые профессионалы» Worldskills Russia яхача Региональни чемпионата «Истинг-войлочное искусство» яхача компетенцех[1].
«Дзурдзуки» юкъарлоно дукха къахьийгад фертах истингах хьаяр ГӀалгӀай мехка юхадоаржадеш. Цар истингаш йовзаш мехкал арахьа а. Танзилайца цхьана къахьегаш ва цун цӀенда Гойганаькъан Йоакъап. Уж ба Къулбаседа Кавказе фертах кӀувсаш хьадара говзал Ӏомаю хьалхара ишкол хьайийлараш. Цу ишколо хӀара шера арахец 50 кӀувсаш хьаду говзанча. Дешар йистедаларца дӀакхухь «Истинг хӀара цӀагӀа!» яха аукционаши ярмаркаши[2].
2023-ча шера Дзовранаькъан Танзила кулгалхо йолаш арахийцад Хьоашаланаькъан Ӏаьлий кхоллама хетадаь арахийцад «Мукъама атлас» «Илли» яхача проекте гӀолла. Мукъама атлас Хьоашаланаькъан Ӏаьлий кхоллама 80 шу дузаш арахийцад, иштта из арахецар дийзад ГӀалгӀай паччахьалкхен 100 шу дизарца. Цунна юкъе 152 биографии, 140 халкъа йиш, 223 мукъами, 338 сурти да. Мукъамаш тохкаш, 289 хьаст тахкаб, иштта архивашкареи музеешкареи кхоачам. Из арахецаш къахьегаш хиннав 24 говзанча[3].
Кхоллам
• АНО «ГӀалгӀай тархьара-географически юкъарло «Дзурдзуки»
• «Ингушский национальный орнамент. ГӀалгӀай къаман гӀарчош»