Дугенаькъан Лом-Ӏаьлий Мухьмад
| Дугенаькъан Лом-Ӏаьлий Мухьмад | |
|---|---|
| эрс: Дугиев Магомед Лом-Алиевич | |
 | |
| Ваь таьрахь | 3 оагӀой 1995 (30 шу) |
| Ваь моттиг | |
| Паччахьалкхе | |
| Леладу гӀулакх | оазархо, лор |
Дугенаькъан Лом-Ӏаьлий Мухьмад (эрс: Дугиев Магомед Лом-Алиевич; 3 оагӀой 1995, Наьсаре, ГӀалгӀайче) — оазархо, ГӀалгӀайчен йоазонхой юкъарлон доакъашхо, паьхкий лор. «Сих ма ле» яха байтий гуллам арахийцаб 2025-ча шера.
Биографи
Дугенаькъан Лом-Ӏаьлий Мухьмад ваьв 1995-ча шера оагIой бетта 3-ча дийнахьа Наьсаре. Из вахаш ва ГIалме шахьарерча Гадаборша-Юрта. Мухьмад дезала́ юкъе виълагӀа ва, цул йоккхагӀа кхо йиша я. Мухьмадал зӀамагӀа цхьа воша ва. Ийс класс яккхалца цо дийшад Гадаборша-Юртарча юкъерча ишколе, 10-11 классаш яьхай Iаьлий-Юртарча № 1 йолча гимназе. 2013-ча тӀехдика ишкол чакхъяьккха, из деша эттав ГIалгIай паччахьалкхен университете лорий факультете[1].
Болх
Деша ваггӀаше, из болх беш хиннав Наьсарерча дарбанче. 2020-ча шера ГIалгIай паччахьалкхен университет яьккхачул тӀехьагӀа, цо Ставрополерча лорий университете ординатура чакхъяьккхай «пульмонологи» яхача даькъе. Цу шера Мухьмад балха эттав Ставрополерча консульце-диагностикан клинически поликлинике. Иштта, ординатура яьккхача хана денз, из къахьегаш ва Ставрополерча сиха лорий гӀо деча дарбанче пульмонолог волаш, цул совгӀа цо унахой тӀаийбу Ставрополерча Йиста клинически дукха профилаш йолча юкъарче а.
Кхоллам
Мухьмада байташ язъю тоъал ха я: зӀамига волча хана денз. 2015-ча шера из бӀубенна къахьега волавеннав. Байташ язъяра бокъонашца хьакхашта ваьннав, цудухьа ха мел йоала цун кхоллам говзалагахьа лакхерча лагӀа тӀа баьннаб.
Мухьмада байташ кепатеха араювл «Сердало» газета тӀа, «Литературни ГIалгIайче» журнала тӀа, иштта уж юкъеяхай «Ингушская лира» яхача антологена. 2016-ча шера Даьхенна хетаяьча байта тӀагӀолла йиш арахийцай[1].
2025-ча шера тов бетта 6-ча дийнахьа Магасерча товшхала юкъарче дӀайихьар «Сих ма ле, са дог» яха байтий гуллам бовзийташ мукъама-оазален кепе йола презентаци. Цига дакъа лоацаш хилар ГӀалгӀай йоазонхой юкъарлон доакъашхой. Хьалхе дӀайихьар ва къонача йоазонхошта юкъера Налганаькъан Илез[2][3].
Белгалдаккхар
- ↑ 1 2 Дугиев, 2025.
- ↑ Презентация книги «Сих ма ле, са дог!» Магомеда Дугиева. https://pisateli-ing.ru/ (6.09.2025). Хоам хьаийца таьрахь: 23.09.2025.
- ↑ Фонд Сунженской центральной библиотеки пополнился литературными новинками. https://sunja.bezformata.com (30.07.2025). Хоам хьаийца таьрахь: 23.09.2025.
Литература
- Дугенаькъан Мухьмад. Сих ма ле, са дог / Мерешканаькъан Султан. — Наьсаре : ООО «Пилигрим», 2025. — 112 с. — 1000 экз. — ISBN 978-5-98864-071-4.