Котанаькъан Макшарипа Ахьмад

Котанаькъан Макшарипа Ахьмад
Ваь таьрахь	20 наджгоанцхой 1960(1960-01-20)
Ваь моттиг	Инаркъе, МагӀалбика шахьар, ЧИАССР, РСФСР, СССР
Кхелха ха	27 маьцхали 2013(2013-08-27) (53 шу)
Кхелха моттиг	Дабе-Юрт, МагӀалбик—Наьсаре машенникъ, МагӀалбика шахьар, ГӀалгӀайче, Россе Федераци
БӀорахол	СССР →  Россе Федераци
БӀун тайпа	Россе Федерацен Чухьарча гӀулакхий министерство
БӀул даь шераш	1985 — 2013
Звани	полицен полковник
Кулгалдаьд	ГӀалгӀай Мехка Кхерамзлен Совет
Сраженеш/тӀемаш	ГӀинбухерча Кавказера терроризм
СовгӀаташи премеши

Котанаькъан Макшарипа Ахьмад (Ахмед Макшарипович Котиев) — россе чухьарча гӀулакхий маьжений болхло, ГӀалгӀай Мехка Кхерамзлен Совета секретарь (2011—2013). Россе Федерацен Турпал (2013, венначул тӀехьагӀа).

Биографи

Котанаькъан Ахьмад ваьв наджгоанцхой бетта 20-ча дийнахьа, 1960 шера Инаркъе. Юртара юкъера ишкол яьккхачул тӀехьагӀа Рязанерча МВД лакхерча ишколе деша эттав. 1985 шера цига дийша ваьннав. Тайп-тайпарча бокъолораеча маьженашка белхаш даьд. 1994 шера Печора яхача пхье (Комий Республика) къахьегама колонен хьакима когаметтоттар хиннав.

ГӀалгӀай Мехка цӀавеча Дола-Коа участкови волаш болх баьб, тӀаккха МагӀалбика ГОВД криминальни милицен хьакима когаметтоттар хиннав. 2000—2007 шерашка ГӀалгӀай Мехка гӀолла йолча Чухьарча гӀулакхий министерствон уголовни лахара урхален хьакима когаметтоттар хиннав. 2007 шерагара 2009 шерага кхаччалца Наьсарен ГОВД хьаким хиннав.

2011 шера бекарба бетта 18 дийнахьа денз ГӀалгӀай Мехка Кхерамзлен Совета секретарь хиннав. Иштта цу шерра тов бетта денз ГӀалгӀай Мехка террористийи экстремистийи никъ бита лаьрхӀача на́ха́ маьршача вахарага юхабахка гӀо дарах йолча комиссен тхьамада когаметтаоттар а хиннав.

Ӏаьдала балха лакхача дарже ва аьнна ца Ӏеш, нахаца чӀоагӀа хьаийна волаш цӀихеза хиннав Ахьмад. Ший мо балха тӀа болча цхьаболча наха тара воацаш, шийга деннар мел ира а хала а хаттар дале а, хур даь ца Ӏеш, тӀагӀолла а юкъара а цхьа бахьан жоп денна ца Ӏеш, майрра мадарра оалаш жоп луш саг вар аьлле вувцаш ва Ахьмад.

2013 шера маьцхали бетта 27-ча дийнахьа балха дӀаводаш Дабе-Юрта кхаьчача хана гӀаьрхоша наькъа тӀа кӀийле яь, Ахьмад чуваьгӀача белха машена герз дийттад. Цига яьча човнех веннав из.

Цхьа бутт тӀехьагӀа тов бетта 30-ча дийнахьа Россе Федерацен Президента № 736 йолча амарца Россе Федерацен Турпал яха сийлен цӀи еннай Котанаькъан Ахьмада́. ОагӀой бетта 9 дийнахьа Наьсаре Дагалоацамеи сийдареи мемориала ГӀалгӀай Республика Мехкадас Евкуранаькъан Юнус-Бикеи Эрсечен МВД Даькъастен федеральни округага гӀолла йолча Керттерча урхален хьаким С. М. Ченчикси РФ Президента цӀерагӀа Котанаькъан Ахьмада гаргарча наха Россе Федерацен Турпала боагӀаш бола «Дошо Седкъа» дӀабелар.

Дагалоацам

• Котанаькъан Ахьмада цӀи латт моакхаза улга тӀа Наьсарерча Дагалоацамеи сийдареи мемориале а МагӀалбикерча Дагалоацамеи сийдареи сквере а.
• МагӀалбикерча парке Котанаькъан Ахьмада сийленг оттадаьд, цу пхье цхьа урам а цун цӀерагӀа я.
• Ахьмад деша ваьгӀача ишколе а цун сийлен улга хьалтехад.

СовгӀаташ

• Россе Федерацен Турпал

Белгалдаккхар

Литература

• Ахмет Газдиев. Герой России Ахмед Котиев до последней минуты своей жизни сохранил в себе человеческую суть (эрс.) // Сердало : газет. — 2022. — 9 декабря.

ТӀатовжамаш

• Котанаькъан Макшарипа Ахьмад  (эрс.). Сайт «Герои страны».
• Памяти Ахмеда Котиева / Сайт МВД Республики Ингушетия