Нальганаькъан Башира Лема
| Нальганаькъан Ле́ма́ | |
|---|---|
 | |
| Керттера хоам | |
| БӀарчча цӀи | Нальганаькъан Баши́ра Ле́ма́ |
| Яь таьрахь | 4 кӀимарса 1997 (29 шу) |
| Яь моттиг | Наьсаре, ГӀалгӀайче |
| Мохк |
 Россе Федераци |
| Болхговзалаш | ашархо |
| Хьинаре хинна шераш | 2007 — хӀанз а |
| Жанраш | йиш |
Нальганаькъан Баши́ра Ле́ма́ (эрс: Нальгиева Лема Башировна; 4 кӀимарса 1997, Наьсаре, ГӀалгӀайче) ― гӀалгӀай ашархо я, ГӀалгӀай Мехка дукха дика хӀамаш карагӀдийна артист я, иштта Нохчий мехкеи Къарший-Малкхарой мехкеи дукха дика хӀамаш карагӀдийна артист а я. 2012 шера берий Евровиденен хоржамий туре яхьарат даьккхар я. Хамхой Ахьмада цӀерагӀа йолча Паччахьалкхен филармоне солистка я.
Биографи
Нальганаькъан Лема яьй 1997-ча шера кӀимарса бетта 4-ча дийнахьа ГӀалгӀай Мехка Наьсаре. Дийшад Наьсарерча «Марем» яхача ишкол-гимназе. Ашараш локхаш я зӀамига йолча хана денз. Эггара хьалха цо лекха йиш я Пхьиленаькъан Махьмад-СаӀида деша́ш тӀагӀолла язъяь йола «Ма вохалахь» яха йиш[1]. 2008 шера маьтсела бетта Абхазе хиннача Дунен къамашта юкъерча къонача вокалистий конкурсе «Золотой голос Кавказа» Лемас хьалхарча моттигах луш йола дошо мейдилг яьккхай[2].
9-ча классе ягӀача хана, ГӀалгӀай Республика хьаяь 20 шу дизара́ хетадаьча концерте из йиш локхаш хиннай хьоашалгӀа вийхача Россе эстрадан цӀихезача ашархочунца Иосиф Кобзонаца[3].
2012-ча шера Лемас дакъа лаьцад берий «Евровидене» хоржамашка Анзор Хаула язъяьча «Моя мечта» яхача ашарца. Цига, финалах чакхъяьнна, цо кхоалагӀа моттиг яьккхай. 2016 шера ший сольни концерт дӀахьоча дийнахьа ГӀалгӀай Республика Мехкдас сийлен звани еннай цунна — «ГӀалгӀай Мехка дукха дика хӀамаш карагӀдийна артист»[4]. Иштта, тӀехьагӀа цунна еннай «Къарший-Малкхарой мехка дукха дика хӀамаш карагӀдийна артист» а, «Нохчий мехка дукха дика хӀамаш карагӀдийна артист» а яха сийлен званеш.
Из дакъа лоацаш хиннай дукхача фестивалешка, царна юкъе я «Эрсечен бераша Европай берашта лаьрхӀа», «НачӀал денна бераш», «Кавказа зовне оазаш», «Кавказа дуне» иштта кхыйола къаман юкъара яхьаш. Кхолламаца дӀахо болх беш Лема деша эттай Москверча Гнесиных цӀерагӀа йолча Мукъама академе.
Хамхой Ахьмада цӀерагӀа йолча Паччахьалкхен филармоне солистка я Лема.
Театре
Нальганаькъан Лемас театра сцена тӀа а толамца къахьийгад. Духхьашха 2018 шера цо дакъа лаьцад «Боадонгара» яхача романа тӀагӀолла оттаяьча спектакле. Керттера долчарех, Зору, амал ловзадаьд цо. Сценарех цун йиш лакхар къаьстта белгалдаьккхад[5].
Ашараш
• Ма вохалахь (дешаш: Пхьиленаькъан Махьмад-СаӀид)
• Нана
• Машар
• Йишийна (сестре)
• Майра кӀантий
• Маша (Шаль) (дешаш: Кайсын Кулиев)
• Зору илли
• Гучаяла
• Гимн братству
• Отчизна! Ингушетия моя! (дешаш: ЦӀечой Беслан)[6]
• Даже лучше чем вчера (2025 шу)
Белгалдаккхар
- ↑ Александар Неверов. Лема Нальгиева / портал «24 СМИ».
- ↑ Молодая вокалистка из Ингушетии Лема Нальгиева завоевала золотую медаль «Золотой голос Кавказа — БО-НА-МИ». https://ingushetia.ru (16.05.2008). Хоам хьаийца таьрахь: 15.10.2025.
- ↑ Иосиф Кобзон поздравит республику с юбилеем новой песней «Моя Ингушетия». Хоам хьаийца таьрахь: 15.10.2025.
- ↑ Леме Нальгиевой присвоено почетное звание «Заслуженный артист Республики Ингушетия». Хоам хьаийца таьрахь: 2025.
- ↑ И. Зауральский. Герои романа «Из тьмы веков» заели // Сердало : газета. — 2018. — 10 ноября (№ 166 (12102)). — С. 1.
- ↑ Лема Нальгиева спела песню на стихи мэра Магаса (20.08.2019). Хоам хьаийца таьрахь: 15.10.2025.