Пхьарий кӀоаг
Пхьарий кӀоаг (ба), иштта язду Пхьари-кӀоаг аьнна — Фуртовга́ юхера чукхийтта́ моттиг. Ширача замалахь денз гӀалаша тамаш еш я, харц болх хулаш я яхаш лоархӀаш я.
ЦӀи
Публицистике гӀалгӀай меттала «Пхьари-кӀоаг» яха цӀи нийслу язъеш[1].
Оаламашка
Пхьарий кӀоаг лоам ба́хача наха дика йовзаш Фуртовга́ юхера моттиг я. Жиний шахьар я, яхаш, ювц из ворххӀе даь хана денз. Цига, наха дувцачох, дукха тамашийна хӀамаш хиннад хьалхарча хана. Цхьаь волаш, бийсана Пхьарий кӀоаг чу ваха вухьаш цхьа къонах вац хьалха, хӀана аьлча, дукха нах кхестабаьбар цига жинаша, са хиллалца ба́ла бахьаш[1].
ДукхагӀа йолча хана цига нийсвеннача сага́ сурт оттадеш хиннад жинаша, из ловзарга кхаьчача санна; каразах дӀаехкаш хиннай говр, духьала дахьаш хиннад шу, ховхача Ӏаьхара дулх тӀа а уллаш, эггара хозагӀа йола йоӀ халхайоахаш хиннай хьаьшаца, са хиллалца… Ӏуйрана боргӀалаш Ӏаххаше, из деррига сурт дӀадоалаш хиннад. БаӀа кӀарцхалах йийхке латташ говр хулаш хиннай, чопах Ӏовахе, кӀаьдвалий ше хиннав, хӀаьта устаг1ан дулх да мотташ диъаьр кхо хиннад[1].
Хийла, тӀехьашкахьа дӀадагӀа фусамдаьй когаш бӀаргадайя, хьаьшо тепча яьккхача, «Ма, ма, ма тохалахь», аьле, корзагӀа лелхаш хиннад жинаш, тӀаккха, тепча яьлча, боргӀал Ӏаьхача санна из сурт дӀадоалаш хиннад. ТӀеххьарча хана а, доаханга даха бераш кхестадаь а моттиг хиннай цига, даггара дахача а, юххе доахкача доахана дӀатӀа ца кхоачаш.
Дика хьаст болаш, шаьра, хоза моттиг я Пхьарий кӀоаг, бакъда, цӀаккха юрт иллаяц цу метте, хӀана, аьлча, ший даьй ба цунна, боккхийча наха дувцарах. Дунен Ӏилмо яхача беса из дийцача «аномальни зона» я из[1].
Белгалдаккхар
- ↑ 1 2 3 4 Цуров, 2015, оа. 5.
Литература
- Р. Цуров. ГӀалгӀай мехка тамашийна моттигаш. Пхьари-кӀоаг // Сердало : газет. — 2015. — 16 июля.