Суммая
| Суммая | |
|---|---|
| Горчханаькъан Хьажбикара Мадина | |
.jpeg) | |
| Яь таьрахь | 2 оагӀой 1992 (33 шу) |
| Яь моттиг | |
| Паччахьалкхе | |
| Леладу гӀулакх | ашархо |
Горчхананаькъан Хьажбикара Мадина, дукхагӀа йовз «Суммая» яхача цӀерах (эрс: Горчханова Мадина (Суммая); 2 оагӀой 1992, Шолжа-ГӀала) — гӀалгӀай ашархо, ГӀалгӀай Мехка дукха дика хӀамаш карагӀдийна артистка (2021), Нохчий мехка дукха дика хӀамаш карагӀдийна артистка (2015)[1], Хамхой Ахьмада цӀерагӀа йолча Паччахьалкхен филармоне болхло.
Биографи
Суммая яьй 1992-ча шера оагӀой бетта 2-ча дийнахьа. Цу заман чухьа цар дезал Шолжа-ГӀалий тӀа баьхаб. Цун да Горчханнаькъан Хьажбикар ва, нана — Мугаева Совдат. Мехкара политически хьал дикка хувцадаларах, Шолжа-ГӀалий тӀа тӀом оттарах, цигара дӀабаха бийзаб Хьажбикареи Совдатеи дезала. Цудухьа уж Казахехье баха дӀабахаб. Шин шера баьхаб уж Кустанайски областа Кушмурун яхача моттиге, цигарча ишколе деша яхай Мадина. ЗӀамига артистка эггара хьалха цига дӀаяйзай. Дукха вайнаьха бераш а дагӀаш хиннад цу ишколе деша. Хьалхара илли ала наха хьалхашка йиӀиг араяьннай ший 6 шу даьннача хана. Дадашева Тамаре кхолламера «Халхавала хьо» яха илли да цо духхьашха дӀааьннар. Дукха ха ялале, Наьсаре баха цӀабаьхкаб уж. Наьха цӀа а лаьца, цох ахча телаш, баха бийзаб цхьан юкъа, шоай фусам хьалъе вӀаштӀехьадаллалцца[1].
Дешар
Наьсаре из деша яхай шоаш бахача цӀенна эггара юхегӀа йолча Наьсарерча № 3 йолча юкъерча ишколе. Цига яьгӀай из ишкол яьккха яллалцца. Цу хана пандар лакха чӀоагӀа ловш йола йиӀиг Йовлой Раяс шийга дӀаийцай, массехк шера цунца болх бича, из тайп-тайпарча пандарчий яхьашка толашагӀйола моттигаш яха йолаеннай. Ишкола юкъарча вахаре хьинаре дакъа лоацаш, хиннай из цу даькъе а, хьалхарча шерашка санна. Ишкол яьккхача, из деша яхай Буро чу йиллача эконмикани бокъо йовзареи институте. Из институт цо дика чакхъяьккхай[1].
Болх
Ший 15 шу даьннача хана из ашархо санна балха дӀаийцай Нохчий культуран депортаменте. Цу хана вайзав цунна Усманов Ӏимран. Из хьехархо волаш, Суммаяс къахьийгад диккача хана. Цигара цӀаеначул тӀехьагӀа из балха эттай Хамхой Элмарзий Ахьмада цӀерагӀча Наьсарерча филармоне. Цу хана денз, цига къахьегаш хьаенай, лакхарча дарже йола солистка-вокалистка йолаш. Цул тӀехьагӀа цун хьехархо хиннав гӀалгӀай иллиалархо Хулаганаькъан Артур. Цунца болх бе йолаенначул тӀехьагӀа хьаийцай цо Суммая яха цӀи[1].
СовгӀаташ
• 2015-ча шера еннай «Нохчий Мехка укха дика хӀамаш карагӀдийна артист» яха цӀи[2][3]
• 2021-ча шера еннай «ГӀалгӀай Мехка укха дика хӀамаш карагӀдийна артист» яха цӀи[4]
Белгалдаккхар
- ↑ 1 2 3 4 Арчакхнаькъан С., 2021.
- ↑ Указа главы Чеченской республики. Хоам хьаийца таьрахь: 15.10.2025.
- ↑ Работники культуры Ингушетии отмечены государственными наградами. https://gazetaingush.ru. Хоам хьаийца таьрахь: 25.10.2025.
- ↑ Работники культуры Ингушетии отмечены государственными наградами. Хоам хьаийца таьрахь: 15.10.2025.