Хулаганаькъан Исраьила Артур
| Хула́ганаькъан Исраьила Арту́р | |
|---|---|
| эрс: Хулагов Артур Исраилович | |
 | |
| Ваь таьрахь | 18 тушола 1983 (43 шу) |
| Ваь моттиг |
 СССР |
| БӀорахол |
 Россе Федераци |
| Леладу гӀулакх | Ашархо, мукъамхо |
Хула́ганаькъан Исраьила Арту́р (эрс: Хулагов Артур Исраилович; 18 тушола 1983, Наьсаре, Нохч-ГӀалгӀай АССР) — ГӀалгӀайчен Халкъа артист, ашархо, Хамхой Ахьмада цӀерагӀа йолча ГӀалгӀайчен паччахьалкхен филармоне болхло, хьехархо. МГУ яьккхай 2006-ча шера «Эстрадно-джазовое пение» яхача говзалах. ЦӀихезача проектах я цун проект «Бека пандар, ека оаз»[1].
Биографи
Дешар
Хулаганаькъан Исраьила Артур ваьв 1983-ча шера тушола бетта 18-ча дийнахьа Наьсаре. ЗӀамига волча хана денз хиннав кхолламагахьа башха волаш, говзал хьагойташ. Артур кхийннав дукхача дезала юкъе: уж ба пхи вошеи ши йишеи. Цо чам болаш къахьегаш хиннад хореографе а, вокала а, сурта диллара а, фортепиано а, вокала а доазон тӀа[2].
1995-ча шера Артур лауреат хиннав «Утренняя звезда» яхача 7-13 шераш даьннарашта юкъе дӀакхухьача республикашта юкъерча конкурсе «хореография и вокал» яхача номинацех хьалхара моттига яккхарах.
1999-ча шера Артура тӀехдика чакхъяьккхай Наьсарера лицей, из болха лаха волавеннав деша вагӀача хана. 1999-ча шера из дӀачуийцав ГӀалгӀайчен паччахьалкхен филармоне къаман мукъама кечалий оркестре, цига цо болх баьб лакхерча дешаре деша отталца.
Лицей яьккха ваьлча Артур деша эттав Краснодарерча паччахьалкхен товшхала института социально-товшхала балха факультете, «Культурологи» яха балхаговзал хержа. Из цо йистеяьккхай 2005-ча шера.
Сольни кхоллам цо болабаьб 2000 шераш долалуча хана. Дешва вагӀача хана из къахьегаш хиннав ашараш дӀаязъеш, керда мукъамаш кхоллаш.
Товшхала доазув дӀахо кӀоаргагӀа тахка уйла йолаш, 2006-ча шера из деша эттав Москверча хӀанзарча исбахьален института «Эстрадан мукъама исбахьале» яхача фвкультете, «Эстрадно-джазовое пение» яха говзал хержа[2].
2012-ча шера из деша эттав М. Ломоносова цӀерагӀа йолча Москверча паччахьалкхен университете исбахьален факультете. Цига дешача хана, цо къахьийгад аспирантуре а. «ГӀалгӀайчен эстрадан мукъама багахбувцамца бувзаме: бувзам, дегӀабара наькъаш» яха диссертаци тӀехдика чакхъяккхарца, цох хиннав исбахьален Ӏилмай кандидат[1].
Кхоллама болх
2008-ча шера цо дӀадихьад ший хьалхара сольни концерт. Сольни программа юкъедахад иллеш «Къонахий мохк», «Пламя свечи», «Я поднимусь в облака». Из ашархо хинна ца Ӏеш, кхы а хьехархо ва. Дукхача шерашка вокал хьехаш хиннав «Марем» цӀи йолча гимназе. Цо хьийха ба дукха цӀихеза ашархой: Суммая, Нальганаькъан Лема, Хучабаранаькъан Индира, Татренаькъан Даяна, Альфия. Цо яьча проекташта юкъе лоархӀаме моттиг дӀалоацаш, багахбувцамца боккха бувзам болаш хиннай «Бека пандар, ека оаз» яха мукъама проект. 2007-ча шера тов бетта цунна Заьзганаькъан Мухьмада Мурада амарах еннай Халкъа артиста сийлен цӀи[1].
СовгӀаташ
• ГӀалгӀайчен Халкъа артист (2007 шу)[3].
Белгалдаккхар
- ↑ 1 2 3 Артур Хулагов: «Любовь к искусству меня сопровождала всегда» (18.07.2020). Хоам хьаийца таьрахь: 9.10.2025.
- ↑ 1 2 Не оскудела ингушская земля талантами. ingushetia.ru (3.08.2008). Хоам хьаийца таьрахь: 9.10.2025.
- ↑ Указ Президента РИ «О присвоении почетных званий Республики Ингушетия». ingushetia.ru (8.09.2007). Хоам хьаийца таьрахь: 9.10.2025.