Эсмарзанаькъан Ӏалихана Ӏалаудин
| Эсмарзанаькъан Ӏалиха́на Ӏала́удин | |
|---|---|
 | |
| Керттера хоам | |
| Ваь таьрахь | 15 наджгоанцхой 1980 (45 шу) |
| Ваь моттиг | МагӀалбика шахьар, Юкъера Ачалкхе, ЧИАССР |
| Мохк |
 Россе Федераци →  СССР |
| Белха-говзалаш | иллиалархо, оазархо, мукъамхо |
| Жанраш | илли, лирика йиш |
Эсмарзанаькъан Ӏалиха́на Ӏала́удин (эрс: Эсмурзиев Алаудин Алиханович) — иллиалархо, мукъамхо, Россе Федерацен мукъамхой юкъарлон гӀалгӀай отделене тхьамада.
Биографи
Ӏалаудин ваьв 1980-ча шера наджгоанцхой бетта 15-ча дийнахьа ЧИАССР МагӀалбика шахьаре Юкъерча Ачалкхе. 1997-ча шера маьтсели бетта 24-ча денна цо, дийша, йистеяьккхай МагӀалбика шахьара Дабе-Юрта № 14 йола юкъера ишкол. 1997-ча шера маьцхали бетта 1-ча денна денз 1998-ча шерага кхаччалца цо болх баьб Шолжа-ГӀала́ тӀа «Жимала» яхача эстрадан тоабанна юкъе волаш[1].
Болх
1998—2021 шерашка из болх беш хиннав тайп-тайпарча дарже Хамхой Э. А. цӀерагӀа йолча Филармоне. 1998—2000 шерашка болх баьб хора артист волаш. 2000—2011 шерашка из хиннав исбахьален персонала иллиалархо. 2011—2012 шерашка Ӏалаудин хиннав кулгалдеш исбахьален-суртъоттама даькъе. 2014—2019 шерашка маӀача нахах латтача «Асса» яхача тоабанна исбахьален кулгалхо волаш болх баьб цо. 2003-ча шера «Единая Россия» яхача партена юкъе вахав из. 2009—2010 шерашка Ӏалаудина дийшад Тбилисе Иванэ Сараджишвили цӀерагӀа йолча паччахьалкхен консерваторе. 2013-ча шера цо болх баьб «МАГАС» яхача къаман телерадиокомпане мукъама редакце редактор волаш. Цу шера из болх беш хиннав Юкъерча ишколерчеи Дабе-Юртарчеи № 14, № 15, № 27 йолча кхаь ишколашка.
2015-ча шера Эсмарзанаькъан Ӏалаудина Москверча РУТИ ГИТИСе лакхера дешар чакхдаьккхад мукъама театра актёралла дийша.
2015-ча шера бекарга бетта денз Магаса пхье администрацен тхьамадан Юкъарча Совета доакъашхо ва.
2014—2021 шерашка цо болх баьб Эрсий Паччахьалкхен Мукъама-драматически театра актёр волаш.
2017-ча шера цо дешар лакхдаьд РАНХиГС паччахьалкхен урхалдар Ӏомадеш.
2018—2022 шерашка цо болх баьб «ГӀалгӀайче» яхача Паччахьалкхен халхара тоабанна конферансье волаш.
2019 шера денз 2023 шерага кхаччалца Магасерча Пхьен Совета депутаталла болх баьб.
СовгӀаташ
• 2016-ча шераАбхазе Сухуми пхье дӀайихьача «Доазув доаца доттагӀал» («Дружба без границ») яхача VI къаман юкъарча иллиалархой фестивала I-ча даржа Лауреат
• «Лицо года 2017» яха диплом
• «Россеца дола 460 шу дузаш» яха майдилг (Нальчик)
• Дукха дика хӀамаш карагӀдийна ГӀалгӀайчен артист (2003 шу)
• «Культуран баьри» («Рыцарь культуры») яхача Къаман Юкъарча Дошоча Ордена кавалер
• Сийлахьа вола Магаса пхье бӀорахо (2015 шу)
• Дукха дика хӀамаш карагӀдийна Абхазе артист (2017 шу)
• «ГӀалгӀайчено Россеца цхьоагӀо яь 250 шу дузаш» майдилг (2019 шу)
• «Искусствонна къахьегар — дото седкъа» («Служение искусству — Серебряная Звезда») яха СНГ Орден (2023 шу)
Белгалдаккхар
- ↑ Эсмурзиев Алаудин Алиханович. Союз композиторов России. Хоам хьаийца таьрахь: 12.01.2025.
ТӀатовжамаш
- Эсмурзиев Алаудин Алиханович. Союз композиторов России. Хоам хьаийца таьрахь: 12.01.2025.
- Алаудин Эсмурзиев- директор РДНТ. ГКУ «РЕСПУБЛИКАНСКИЙ ДОМ НАРОДНОГО ТВОРЧЕСТВА И КУЛЬТУРНО-МАССОВЫХ МЕРОПРИЯТИЙ» (21.12.2021). Хоам хьаийца таьрахь: 12.01.2025.
- Алаудин Эсмурзиев – золотой голос Ингушетии. Ингушетия (газета) (9.11.2012). Хоам хьаийца таьрахь: 12.01.2025.