Ӏамархананаькъан Мухьмада Амур
| Ӏамархананаькъан Мухьмада Амур | |
|---|---|
| эрс: Амур Магомедович Амерханов | |
| Ваь таьрахь | 20 ардара 1979 (45 шу) |
| Ваь моттиг | Илдарха-ГӀала |
| БӀорахол |
 Россе Федераци |
| Болхговзал | Ло:Кинорежиссёр, сценарист |
| Карьера | 2019 шера денз |
| Ластар | тархьара кино |
Ӏамархананаькъан Мухьмада Амур (эрс: Амур Магомедович Амерханов) — гӀалгӀай режиссёр, продюсер, сценарист, композитор, иллиалархо. «LKN» яхаш хинна мукъама тоаба вӀашагӀъеллар а цун доакъашхо а (солист) хиннав. «Сайти — Зовле воӀ» яхаш гӀалгӀай меттала хьалхара болхговзала кино даьккхар ва[1], иштта цунна тӀехьа йизза метраж йола «Письмо» яха кино а даьккхад[2].
Биографи
Ӏамархананаькъан Амур ваьв Нохч-ГӀалгӀай АССРе Илдарха-ГӀалий тӀа 1979 шера ардара бетта 20-гӀча дийнахьа[3]. Амура ше хьадийцачох цун да-нана ГӀалгӀай Республика меттаоттае лийрхӀача гӀалгӀай къаман болама доакъашхой хиннаб. РСФСР халкъа депутат а, тӀехьагӀа (1990-1993 шерашка) Россе Федерацен Лакхехьарча совета къамай совета доакъашхо хиннача Къоастой ИбрахӀима гӀончаш хиннаб уж[2].
Амур театра а кино а болх Ӏомабеш дийша ва. Борис Щукина цӀерагӀа йола Театра институт а, С. А. Герасимова цӀерагӀа йола Ерригроссен паччахьалкхен кинематографен институт а яьккхай цо[2]. Цигара ваьлча Москверча театрашка болх баьб. Гитар лакха а илли алара начӀал долаш хиннав из зӀамагӀа волча хана денз. 2001 шера Чуранаькъан Ӏумараца цхьана мукъама тоаба вӀашагӀъеллай цо «ЛКН» яхаш. Из тоаба хьахилара ди лоархӀ 2001 шера бекарга бетта 13-гӀа ди – цу дийнахьа цар коллектива дебют хиннай «Радио Шансон» оттадаь долча концерте. «Поезд на Назрань» яха йиш лакхай цар цига духхьашха. ТӀехьагӀа тоаба чӀоагӀа гӀоръяьнна хилар Россе Федераце а доазол дехьа а[4].
2019 шера ший хьалхара кино даккхар болх вӀашагӀбеллаб, «Сайти — Зовле воӀ» яхаш лоаца метраж йола кино. ГӀалгӀай меттала хьалхара болхговзала кино лоархӀаш да из[1]. 16 россерча а дунен къамашта юкъерча а кинофестивалашка котало яьккхай цо[2].
2024 шера йизза метраж йола кино даьккхад «Письмо» яхаш[2].
СовгӀаташ
Белгалдаккхар
- ↑ 1 2 Харсиева, 2018.
- ↑ 1 2 3 4 5 Харсиева, 2023.
- ↑ «Кинопоиск», 2019.
- ↑ ЛКН / «Радио Шансон».
Литература
- Харсиева Л. Сайти сын Зоули — первый профессиональный фильм на ингушском языке // «Ингушетия» : газета. — 2018. — 14 декабря.
- Харсиева Л. «Письмо» на пути к юбилею // «Ингушетия» : газета. — 2023. — 11 сентября.
ТӀатовжамаш
- «Кинопоиск». Амур Амерханов. kinopoisk.ru. Информационн-мультимедийный портал «Кинопоиск» (2019). Хоам хьаийца таьрахь: 5.09.2024.
- «Это Кавказ». Режиссер Амерханов представил трейлер нового фильма «Письмо». etokavkaz.ru. Информационно-познавательный мультимедийный портал агентства ТАСС (19.07.2024). Хоам хьаийца таьрахь: 5.09.2024.
- Темурзиев Д. Ингушский полнометражный художественный фильм «Письмо». Амур Амерханов. gazetaingush.ru. Газета «Ингушетия» (24.01.2024). Хоам хьаийца таьрахь: 5.09.2024.