Гадаборшанаькъан Ювназа Або

Гадаборшанаькъан Ювназа Або
эрс: Гадаборшев Або Юнусович
Ваь таьрахь	1942(1942)
Ваь моттиг	Гадаборшакъонгий-Юрт, ГӀалме шахьар
БӀорахол	СССР →  Россе Федераци
Леладу гӀулакх	хоамбоаржабархо, йоазонхо

Гадаборшана́ькъан Ю́вназа Або́ (эрс: Гадаборшев Або Юнусович) — «ГӀалгӀайче» газета 1997 шера, 2002—2008 шерашка хинна керттера редактор, хоамбоаржабархо, йоазонхо.

Вахара сурт

Гадаборшакъонгий Або ваьв 1942-ча шера шоай тайпан цӀи лелаеча (Гадаборшакъонгий-Юрта) ГӀалме шахьара чуйоагӀача юрта Сипсой Ювназеи Бузуртананаькъан Ӏисакха Губатеи дезале. Бокъонца сакхетарг хилале, диъ шу даьннача хана, из мехках ваьккхав. Цар дезал ГӀалгӀай къам Сибаре дигача хана Кокчетава областе баха хайшаб. Пхи бер хиннад цар дезале кхувш: виъ воӀи цхьа йоӀи — эггара воккхагӀа Або а волаш. ГӀазакхстанехьа ишколе деша ваха а, цига тайп-тайпара Ӏилмаш карадерзаде а вӀаштӀехьадаьннад цун. Ишкол дика дешаш чакхъяьккхача, цунна лаьрхӀад йоазонца бувзабенна болх бе, цудухьа Ростоверча университета хоамбоаржабархой факультете. Хоамбаоражабар болхговзал йолаш нах кӀезига хиннаб ГӀалгӀай Мехка, цӀенхашта даь а тӀехьале беркате хургйолаш а гӀулакх хиннад цунна карагӀдаьннар. Цу хана уж баьхаб республикан нанагӀала тӀа — Шолжа-ГӀала тӀа .

Болх

Ювназа Або дӀахо балха эттав кагирхой газета редакце. Або къахьийгад дукхагӀа къердача а кертерча а газеташка: «Шолжа-ГӀала тӀара болхло», «Комсомола фу», «Социализма ХӀирийче», «Независимия газете», «Сердало», кхычахьа а. Нохч-ГӀалгӀай республика ехачул тӀехьагӀа, Ювназа Або а цун дезал а баха бахаб Сипсой-ГӀала тӀа. Цо къахьийгад «Социализма ХӀирийче» (эрс: Социалистическая осетия) яхача газете. Цхьан юкъа из болх беш хиннав «Кортамукъа газет» (эрс: Независимая газета) яхача редакце. 1997 шера, 2002—2008 шерашка цо болх баьб «ГӀалгӀайче» газета керттера редактор волаш .

СовгӀаташ

Ювназа Або республикан культуран гӀорваьнна болхло хиннав, «КарагӀдаьннарех» яха орден, Ерригроссе юртбоахама хьисап деш дӀаяздеча хьинаре дакъалацарах медаль еннай цунна .

Сесаг-дезал

Цои цун фусам-нанас Розаси воI-йоI кхедаьд: Илези Азаи. Илез 1990-ча шера ваьв. Из Москвера Россе социальни университет яьккха ва. Информатикаца, хьисап деча техникаца ювзаенна я цун балха говзал. Азас ГӀалгӀай паччахьалкхен университет яьккхай, из экономист я.

Вахара чаккхе

Гадаборшакъонгий Або кхелхав 2018 шера июль бетта 16-ча дийнахьа. ДӀавеллав Ювназа Або дай баьхача а ше ваьча а Гадаборшакъонгий-Юрта.

Белгалдаккхар

ТӀатовжамаш

• Ӏарчакханаькъан Сали. Даим бакъдар лийха саг (гӀал.) // «Сердало» : газет. — 2022. — 29 лайчилла.