Йовлой Заьлмаха Хьава
| Йовлой Хьава | |
|---|---|
 | |
| Яь таьрахь | 27 тов 2000 (25 шу) |
| Яь моттиг | |
| БӀорахол |
 Россе Федераци |
| Леладу гӀулакх | ашархо |
Йовлой Заьлмаха Хьава (эрс: Евлоева Хава Зелимхановна; 27 тов 2000, Наьсаре, ГӀалгӀайче) — гӀалгӀай ашархо, театра актриса. Хамхой Ахьмада цӀерагӀа йолча паччахьалкхен филармоне а «Гӏалгӏайче» яхача къаман халхара ансамбле а солистка-вокалистка я. ГӀалгӀай Мехка дукха дика хӀамаш карагӀдийна артистка.
Биографи
Йовлой Хьава яьй 2000 шера тов бетта 27-ча дийнахьа Наьсаре ГӀалгӀай Мехка. Бекъи-Юртарча юкъерча ишколе деша яьгӀай. Из яьккхачул тӀехьагӀа Ростоверча паччахьалкхен экономикан университете (РИНХ) деша эттай.
2016 шера болх беш я лакхерча оагӀата солистка-вокалистка йолаш Хамхой Ахьмада цӀерагӀа йолча филармоне. Керттера белха моттиг из я цун. 2019 шера болх беш я актриса йолаш ГӀалгӀай Мехка паччахьалкхен эрсий мукъама-драматически театре[1]. 2023 шера иштта болх бу солистка-вокалистка йолаш «Гӏалгӏайче» яхача къаман халхара ансамбле.
Ашархочун говзала толамаш
Хьава зӀамига йолча хана денз хиннай гӀалгӀай ашараш лакхарца сакъердам болаш. Цун дебют 2016 шера хиннай. Цу шера Нальчике дӀайихьа хиннача «ДоттагӀала седкъарче» («Созвездие дружбы») яхаш КхоалагӀча Къамашта юкъерча конкурсе I моттиг яьккхай цо. 2017 Алтай Республике хиннача «Таланты и поклонники» яхача Ерригроссе берий-ондаргий кхоллама фестивале, «Вокальное искусство» яхача номинацех хьалхарча даржа лауреата диплом а «Приз зрительских симпатий» диплои а даьккхад. Иштта, цу шера Махач-Кхаьлле дӀайихьа хиннача ГӀинбухен-Кавказа таможенни урхален таможенни маьженаша оттаяьча ше хьабеча художественни кхоллама гойтам-конкурсе вокальни исбахьален номинацех Гран-при ХХII а жюри лаьрххӀа дола яхьарат а даьккхад. 2018 шера Шолжа-ГӀалий тӀа СССР Халкъа артист Муслим Магомаева дагалоацама дӀайихьача Къамашта юкъерча фестиваль-конкурсе хьалхарча даржа диплом даьккхад. 2019 шера Тана-тӀарча-Ростове «Приз зрительских симпатий» диплом даьккхад БарайттлагӀча Эрсечен Дельфийски ловзарашка. Иштта, цу шера Ярославле Гран-при яьккхай «Мы вместе с Россией» яхача Къамашта юкъерча фестивале. 2021 шера лауреат хиннай И. Д. Кобзона цӀерагӀа йолча «Красная гвоздика» яхача къаман мехкагӀончий ашара конкурса Къамашта юкъерча фестивале[2].
2021 шера вокальни исбахьале карагӀдаьннарех а дукхача шерашка пайдане болх барах а сийлен звани еннай «ГӀалгӀай Мехка дукха дика хӀамаш карагӀдийна артистка».
ГӀалгӀай Мехка паччахьалкхен эрсий мукъама-драматически театре оттаеш йолча «БӀаьшерий боадонгара» яхача спектакле дакъа лоацаш я керттера (Зору) амал ловзадеш[3].
СовгӀаташ
- ГӀалгӀай Мехка гӀолла йолча Чухьарча гӀулакхий министерства Сийлен грамота (2018 шу);
- ГӀалгӀай Мехка Доалчен Сийлен грамота (2019 шу);
- «ГӀалгӀай Мехка дукха дика хӀамаш карагӀдийна артист» (2021 шу).
Белгалдаккхар
- ↑ Государственная филармония им. Ахмеда Хамхоева. О филармонии. Хоам хьаийца таьрахь: 26.06.2025.
- ↑ Пресс-служба Главы и Правительства РИ. В Ингушетии подвели итоги фестиваля-конкурса патриотической песни «Красная гвоздика» (12.06.2021). Хоам хьаийца таьрахь: 26.06.2025.
- ↑ В Назрани Ингушетии пройдут показы спектакля «Из тьмы веков». serdalo.ru. «Сердало» (25.06.2024). Хоам хьаийца таьрахь: 22.09.2025.