Озанаькъан Хьасана Муртаз
| Озанаькъан Хьасана Муртаз | |
|---|---|
| эрс: Озиев Муртаз Хасанович | |
 | |
| Ваь таьрахь | 1974 |
| Ваь моттиг |
 СССР |
| БӀорахол |
 Россе Федераци |
| Леладу гӀулакх | артист |
О́занаькъан Хьаса́на Мурта́з (эрс: Озиев Муртаз Хасанович) — театреи кинони актёр, ГӀалгӀайчен дукха дика хӀамаш карагӀдийна артист (2002 шу), ГӀалгӀайчен Халкъа артист (2005 шу)[1].
Биографи
Озанаькъан Муртаз ваьв 1974-ча шера Нохч-ГӀалгӀай АССР Наьсаре. 1990-ча шера, ишкол йистеяьккха, из деша эттав Л. Н. Толстой цӀерагӀа йолча Нохч-ГӀалгӀай паччахьалкхен университете филологе факультета актёра отделене. Цун чам хиннаб следователь хила, цудухьа цул тӀехьагӀа цо яьккхай Ростова паччахьалкхен университета юридически факультет. Юрист наькъ тӀа гӀолла ца водаш, из дӀахо актёра балха́ юкъе дӀачӀоагӀвеннав.
1993-ча шера, дийша валалехьа, из балха эттав Байсаранаькъан И. цӀерагӀа долча ГӀалгӀай паччахьалкхен драма театре. Цо ловзадаьча амалашта юкъе да Ӏадлоапа амал ((«Когда гибнут сыновья» Чахканаькъан С.), почтмейстера («Ревизор» Н. Гоголя), Черноглаза («Террор» Чахканаькъан С.,) Ӏийсай («Как Исса стал господином» Сосаркъанаькъан Аь.), Ӏазе (Боканаькъан Ахьмада «Беке къонгаш»), Жанхота («Жанхот вожар» Чахканаькъан С.), Маркиза («Трактирщица» К. Гольдони), Жамбота («Са кӀаьнк» Чахканаькъан С.), иштта кхыдараш а.
Театре болхбарал совгӀа из къахьегаш хиннав «ГӀалгӀайче» телерадиокомпане, цо кхеллай «Культура», «Народные таланты», «Лоаца аьлча» яха передачаш. Иштта актёр а когаметтаоттар а волаш, цо болх баьб лоаца сакъердаме кино кхоллаш хиннача, «ЗОКХ» яхача кхоллама юкъарлонна юкъе.
1999-ча шера «Дошо сай» яхача республикан преме «Шера толашагӀвола актёр» (эрс: Лучший актёр года) номинаце юкъе из лауреат хиннав. Иштта 1999-ча шера Ялте дӀайихьача «Вместе» яхача телекинофорума «Новеллы» яхача кинох номинант хиннав[2]. 2005-ча шера Озанаькъан Муртаза еннай ГӀалгӀайчен Халкъа артиста сийлен цӀи. 2007-ча шера цо даьккхад «Ахка бода никъ» яха ший хьалхара кино.
Иштта из дакъа лоацаш хиннав тайп-тайпарча фестивалашка: «Сцена без границ» (Владикавказ), «Золотая маска», «Маска плюс» (Москва)[3].