Алал сога

«Алал сога»
Алал сога
Халкъа йиш
Мотт	гӀалгӀай
ЦӀихеза лекхараш	Мовлади Буркаев, Ӏамархананаькъан Амур

«Алал сога» (эрс: «Скажи мне») — гӀоръяьнна гӀалгӀай йиш я Пхьиленаькъан Махьмад-СаӀида байт хьисапе язъяь. Юххьанца кепатехай 1972 шера.

Юкъара хоам

«Алал сога» яха байт язъяьй гӀалгӀай цӀихезача оазархочо, йоазонхочо Пхьиленаькъан Ӏасолта Махьмад-СаӀида. Юххьанца из кепатеха хиннай «Лоаман Ӏуйре» яхача альманаха тӀа 1972 шера. Цул тӀехьагӀа юха а кепайийттай 1979 шереи 2000 шереи.

1980-ча шерашка чӀоагӀа гӀоръяьнна хиннай «Алал сога» байта тӀа Шахбулатов Аднана мукъам тӀа а билла Буркаев Мовлада локхаш хинна йиш. ТӀехьагӀа, 1990-ча шерашка из йиш дӀаязъяьй «Судия ЛОАМ» яха тоаба вӀашагӀъелла гӀалгӀай цӀихеза болча иллиалархоша Новрбийнаькъан Русланеи, Янданаькъан Тамареи, Зейтанаькъан Тимуреи, Беканаькъан ИбрахӀимеи. Цар хьалхарча альбома юкъеяьккха хиннай из.

2020 шера гӀалгӀай иллиалархо а режиссёр а волча Ӏамархананаькъан Амура «Алал сога» яхача ашара ший ка́вер яьккхай.

Алал сога, алал-хьай,
Хье мичара я?
Дувцал тайпа, бувцал даьй,
Сона йовзаргья.
Коача дын сай човхабаь,
Лоаман новкъада,
ВоагIаргва со шунцига,
Хьох бIаргтохара.
Вахар хургдий, кхоане йий
Хьоца воацачун,
Цу хьа бIаргий безамах
Сийг ца кхоачачун?
Вай ца делхош, таккхал Iе,
Цу вай даьшта хой,
Вай ираз да воашта бе
Езар, вайна лой.
Йоацаш къаьна поарталаш,
Доацаш ехамаш,
ВIашагIкхете безараш?
Ловца баккхалаш.
Ва со кийча безама
Къулба-седкъа ба.
Сона болча тешама,
ЙоI, хьай гIоз хьаба.
Алал сога, алал-хьай,
Хье мичара я?
Дувцал тайпа, бувцал даьй,
Сона йовзаргья.
Коача дин сай човхабаь,
Лоаман новкъада,
ВоагIаргва со шунцига,
Хьох бIаргтохара.

Белгалдаккхар

Литература

• Музыкальный атлас. Ингушетия / Авторы-сост.: Дзаурова Т. А-Х., Гогиев Я. И., Дударов А. Я., Чередниченко А. Р., Матиев М. А., Куркиев Р. С., Ильясова А. З., Кодзоева Д. А., Ахциев И. М., Таркоев Р. Р., Газиков Б. Д.. — Ростов-на-Дону : Южный издательский дом, 2023. — Т. I. — С. 352. — 1000 экз. — ISBN 978-5-98864-167-4.