ЗагӀийнаькъан Хасолта Микаьил

ЗагӀийнаькъан Хасолта Микаьил
ЗагӀийнаькъан Хасолта Микаьил
	эрс: Зангиев Микаил Хасолтович
Ваь таьрахь	1936
Ваь моттиг	Наьсар-Керте, Нохч-ГӀалгӀай АССР
Венна таьрахь	14 маьтсела 2009
БӀорахол	СССР → Россе Федераци
Леладу гӀулакх	хоамбоаржабархо, йоазонхо
СовгӀаташ	«КарагӀдаьннарех» яха орден

ЗагӀийнаькъан Хасо́лта́ Мика́ьил (эрс: Зангиев Микаил Хасолтович) — гӀалгӀай хоамбоаржабархо, «Ленина никъ» газета керттера редактор, «Сердало» газетий болхло, йоазонхо ва^[1].

Вахара юхьиг

ЗагӀийнаькъан Микаьил ваьв 1936-ча шера маьтсела бетта 10-ча дийнахьа Наьсар-Керте, ЗагӀийнаькъан Хасолтаи Зазой Элмарзий РабиӀатеи дезале. Микаьила да Хасолта дийша, гӀалгӀай къам Сибаре дигале шоай юртарча юхьанцарча ишколе болх беш хиннав. Уж верригаш пхи воша хиннав: Ахьмад, Мухьмад, Хасолта, ХьакӀаьш, Мехьти. Хасолта гӀалгӀай арабахале кхелха хиннав, совшерг эккхар бахьан долаш. Цу пхе вешех, Сибаренах чакх а ваьнна, цӀавенар алхха цхьа Мехьти мара хиннавац. Алма-Ате баьхаб Микаьилар дезал, цига ваьгӀав из ишколе деша а. ГӀалгӀай мехка ӀоцӀавеначул тӀехьагӀа, Нохч-ГӀалгӀай паччахьалкхен хьехархой института тархьара-филологе факультете деша а этта, из чакхъяьккхай цо^[1].

Болх

«Сердало» газета тӀа ший корреспонденцеш, лустамаш, фельетонаш кепайийттай цо — Наьсарен шахьаре цу газета цӀерагӀа пункт хьа а яь, корреспондент волаш, къахийгад. 1963-ча шера СССР хоамбоаржабархой юкъарлоно дӀаийцав Хасолта Микаьил. ДӀахо дукхагӀйола ха Наьсарен шахьара «Ленина никъ» яхача газета редакце къахьегаш яьккхай цо: цу газета керттера редактор волаш, шийтта шу ха яьккхай цо^[1].

Наьсарен шахьарерча газете болх баьчул тӀехьагӀа, цо дакъа лаьцар Шолжа шахьарера газет хьадеча, цул тӀехьагӀа МагӀалбика газет хьадеш а къахьийгад цо, «Сердало», «ГӀалгӀайче» яхача газетий редакцешка болх беш хиннав^[1].

Кхоллам

Хоамбоаржабара жанрашца къахьегарал совгӀа, исбахьален йоазонаш а даьд цо, царех да 2002-ча шера арадаьнна дукхал эзарнега кхоачаш а йолаш кепатеха «Сурхо тӀара гумманист» яха повесть^[1].

Дезал

ВоккхагӀвола воӀ Мухьмад йӀаьххача хана къахьегаш хиннав дас болх баьча «Ленина никъ» яхача газета корреспондент волаш, цул тӀехьагӀа МагӀалбикерча «Заманхо» яхача кагирхой газета керттера редактор хиннав, «ГӀалгӀайче» яхача газета редактора заместитель хилар цох^[1].

Микаила шоллагӀвола воӀ ЗагӀийнаькъан Микаьила Руслан а дика вовзаш ва ГӀалгӀай Мехка, из ва Байсаранаькъан И. цӀерагӀча драма театра актёр, ГӀалгӀай Республика дукха артист. Цо ловзадаьд бе-беча турпалий а́малаш, цо да́къа лаьцад Н. Гогола «Ревизор», Р. Ибрагимбекова «Ханума», Чахкенаькъан Идриса СаӀида «Асхьаб Бендер», Боканаькъан Ахьмада «ЦӀий кхайк» («Беке къонгаш») яхача а кхыча а спектаклашка^[1]
.

Вахара чаккхе

Хасолта Микаьил кхелхав 2009-ча шера маьтсела бетта 14-ча дийнахьа^[1].

Совгаташ, толамаш

Из вар ГӀалгӀай Республикан культуран гӀорваьнна болхло, иштта цунна еннаяр «КарагӀдаьннарех» яха вай республикан керттера орден^[1].

Белгалдаккхар

↑ ¹ ² ³ ⁴ ⁵ ⁶ ⁷ ⁸ ⁹ Ӏарчакханаькъан С., 2023.

ТӀатовжамаш

Ӏарчакханаькъан Сали. Къоалам Ӏо ца буллаш, чакхваьнна саг (гӀал.) // «Сердало» : газет. — 2023. — 9 наджгоанцхой.

[_f735c684d3f6cc27-1] ¹ ² ³ ⁴ ⁵ ⁶ ⁷ ⁸ ⁹ Ӏарчакханаькъан С., 2023.

[1]