Зангенаькъан Хасолта Микаьил

Зангенаькъан Хасолта Микаьил
Зангенаькъан Хасолта Микаьил
	эрс: Микаил Хасолтович Зангиев
Ваь таьрахь	10 маьтсела 1936
Ваь моттиг	Наьсар-Керте, Наьсарен шахьар, Чечено-Ингушская автономная область[d], Даькъастен край, РСФСР, СССР;
Венна таьрахь	14 маьтсела 2009 (73 шу)
БӀорахол (подданство)	СССР; Эрсече;
Леладу гӀулакх	хоамбоаржабархо, йоазонхо
СовгӀаташ

Занге́наькъан Хасо́лта́ Мика́ьил (эрс: Микаил Хасолтович Зангиев; 10 маьтсела 1936, Наьсар-Керте, Даькъастен край — 14 маьтсела 2009) — гӀалгӀай хоамбоаржабархо, «Ленина никъ» газета керттера редактор, «Сердало» газетий болхло, йоазонхо ва^[1].

Вахара юхьиг

Зангенаькъан Микаьил ваьв 1936-ча шера маьтсела бетта 10-ча дийнахьа Наьсар-Керте, Зангенаькъан Хасолтаи Зазой Элмарзий РабиӀатеи дезале. Микаьила да Хасолта дийша, гӀалгӀай къам Сибаре дигале шоай юртарча юхьанцарча ишколе болх беш хиннав. Уж верригаш пхи воша хиннав: Ахьмад, Мухьмад, Хасолта, ХьакӀаьш, Мехьти. Хасолта гӀалгӀай арабахале кхелха хиннав, совшерг эккхар (эрс.) (гӀа. бахьан долаш. Цу пхе вешех, Сибаренах чакх а ваьнна, цӀавенар алхха цхьа Мехьти мара хиннавац. Алма-Ате баьхаб Микаьилар дезал, цига ваьгӀав из ишколе деша а. ГӀалгӀай мехка ӀоцӀавеначул тӀехьагӀа, Нохч-ГӀалгӀай паччахьалкхен хьехархой института тархьара-филологе факультете деша а этта, из чакхъяьккхай цо^[1].

Болх

«Сердало» газета тӀа ший корреспонденцеш, лустамаш, фельетонаш кепайийттай цо — Наьсарен шахьаре цу газета цӀерагӀа пункт хьа а яь, корреспондент волаш, къахийгад. 1963-ча шера СССР хоамбоаржабархой юкъарлоно дӀаийцав Хасолта Микаьил. ДӀахо дукхагӀйола ха Наьсарен шахьара «Ленина никъ» яхача газета редакце къахьегаш яьккхай цо: цу газета керттера редактор волаш, шийтта шу ха яьккхай цо^[1].

Наьсарен шахьарерча газете болх баьчул тӀехьагӀа, цо дакъа лаьцар Шолжа шахьарера газет хьадеча, цул тӀехьагӀа МагӀалбика газет хьадеш а къахьийгад цо, «Сердало», «ГӀалгӀайче» яхача газетий редакцешка болх беш хиннав^[1].

Кхоллам

Хоамбоаржабара жанрашца къахьегарал совгӀа, исбахьален йоазонаш а даьд цо, царех да 2002-ча шера арадаьнна дукхал эзарнега кхоачаш а йолаш кепатеха «Сурхо тӀара гумманист» яха повесть^[1].

Дезал

ВоккхагӀвола воӀ Мухьмад йӀаьххача хана къахьегаш хиннав дас болх баьча «Ленина никъ» яхача газета корреспондент волаш, цул тӀехьагӀа МагӀалбикерча «Заманхо» яхача кагирхой газета керттера редактор хиннав, «ГӀалгӀайче» яхача газета редактора заместитель хилар цох^[1].

Микаила шоллагӀвола воӀ Зангенаькъан Микаьила Руслан а дика вовзаш ва ГӀалгӀай Мехка, из ва Байсаранаькъан И. цӀерагӀча драма театра актёр, ГӀалгӀай Республика дукха артист. Цо ловзадаьд бе-беча турпалий а́малаш, цо да́къа лаьцад Н. Гогола «Ревизор», Р. Ибрагимбекова «Ханума», Чахкенаькъан Идриса СаӀида «Асхьаб Бендер», Боканаькъан Ахьмада «ЦӀий кхайк» («Беке къонгаш») яхача а кхыча а спектаклашка^[1]
.

Вахара чаккхе

Хасолта Микаьил кхелхав 2009-ча шера маьтсела бетта 14-ча дийнахьа^[1]. ДӀавеллав Наьсар-Кертерча кашамашка^[2].

Совгаташ, толамаш

ГӀалгӀай Мехка дукха дика хӀамаш карагӀдийна товшхала болхло;
«КарагӀдаьннарех» орден (ГӀалгӀайче)^[1].

Белгалдаккхар

↑ ¹ ² ³ ⁴ ⁵ ⁶ ⁷ ⁸ ⁹ Ӏарчакханаькъан С., 2023.
↑ Караев, 2021.

Литература

Ӏарчакханаькъан Сали. Къоалам Ӏо ца буллаш, чакхваьнна саг (гӀал.) // «Сердало» : газет. — 2023. — 9 наджгоанцхой.
Магомед Караев. Профессия на всю жизнь: 10 мая исполнилось бы 85 лет ветерану ингушской журналистики Микаилу Зангиеву (эрс.) // «Ингушетия» : газета. — 2021. — 10 мая.

[_f735c684d3f6cc27-1] ¹ ² ³ ⁴ ⁵ ⁶ ⁷ ⁸ ⁹ Ӏарчакханаькъан С., 2023.

[_a726d68542c7ccb2-2] Караев, 2021.

[1]

[2]