СелаӀад (журнал)

СелаӀад
СелаӀад
журнала беттагарг
Специализаци	берий журнал
Мотт	гӀалгӀай
Керттера редактор	Горчхананаькъан Бадрудин
Хьадийлараш	Чахканаькъан СаӀид
Мохк	Россе Федераци,  ГӀалгӀайче
Арахецар	ГӀалгӀай Мехка Доалче
Хьадийла таьрахь	1986
Тираж	2500

«СелаӀад» (эрсий меттала маӀан даьккхача — «Радуга» ) — гӀалгӀай меттала арадувла берий журнал да. ГӀалгӀай Мехка цу тайпара цаӀ мара дац.

Тархьар

СелаӀад журнал арахеца доладаьд 1986 шера тов бетта 9-ча дийнахьа. Юххьанца Нохч-ГӀалгӀай АССРа комсомола маьже йолаш арадийнад из, гӀалгӀайи нохчийи редакцеш цхьана а йолаш, бетта цкъа къаьстта ши номер араювлаш хиннай гӀалгӀайи нохчийи меттала. СелаӀад (нохчий ӀаьдалагӀа — СтелаӀад) дийлар а цун хьалхара редактор а Чахканаькъан СаӀид хиннав.

СелаӀада хьалхара номер, 1986 шу.

1991 шера советий Ӏаьдал дехача Нохч-ГӀалгӀай АССР екъалуча юкъа журнал арадувлар цкъа телха а телха, тӀаккха юххера сеца хиннад. ГӀалгӀай паччахьалкхе юхаметтаоттаяьчул тӀехьагӀа журнал гӀалгӀай метта юха хьадийлад духхьал ГӀалгӀай Мехка арадувлаш. Цу гӀулакха къаьстта дика къахьийга хиннад хоамбоаржабархочо Майсиганаькъан Саламхана. 1993 шера Наьсаре арахеца доладаьд журнал. Цу хана денз ца хаддаш арадувл.

Журнал мел дахача юкъа цун оагӀонаш тӀа хьинаре кепайийттай шоай произведенеш цӀихезача йоазонхоша, гӀалгӀай литературан классикаша: Боканаькъан Ахьмада, Ведажанаькъан Ахьмада, Чахканаькъан СаӀида, Пхьиленаькъан Махьмад-СаиӀда, Коазой Ӏийсас, Хамхой Вахас, Хьоашаланаькъан Ӏаьлас. ТӀехьагӀа а иштта хьинаре журнала́ яздаьд кхыболча а гӀалгӀай йоазонхоша Ӏарчакханаькъан Сале, Коазой Нурдина, Мерешканаькъан Султана, Хамхой Дауда, Оздой Фатимас, Ӏахилганаькъан Заретас, Орцханаькъан Хадижата, Новразанкьъан Маккас, Евкуранаькъан Лидас, иштта кхычара а.

2001 шера денз журнала учредитель ГӀалгӀай Республика Доалче я.

Керттера редактораш

Тайп-тайпарча ханашка редакценна кулгалдеш хиннаб цӀихеза хоамбоаржабархойи йоазонхойи.

• Чахканаькъан СаӀид (1986—1991)
• Майсиганаькъан Саламхан (1993—?)
• Горчханнаькъан Бадрудин (2015— хӀанзара ха).

Белгалдаккхар

Литература

• Ингушетия: популярная иллюстрированная энциклопедия / Сост. Я. С. Патиев; науч. ред. М. Г. Цароева, Т. Х. Матиев. — Магас : «Сердало», 2023. — 816 с. — ISBN 978-594452-185-9.
• Цороев И. Детскому журналу «Села1ад» («Радуга») исполняется 35 лет (гӀал.) // ГӀалгӀайче : газет. — 2021. — 8 тов.