Йовлой Билана Берс
| Йовлой Билана Берс | |
|---|---|
| Йовлой Берс Биланович | |
 | |
| Ваь таьрахь | 8 оагӀой 1977 (48 шу) |
| Ваь моттиг | Сипсой-ГӀала, Шолжа шахьар, Нохч-ГӀалгӀай АССР, СССР |
| БӀорахол |
 СССР → Россе Федераци |
| Леладу гӀулакх | |
| Лостам | телевидени, хоамбоаржабар, проза |
| Жанр | романаш |
| Кхолламий мотт | эрсий |
| Дебют | «Лоаман Ӏадатех» (По закону гор), 2009 |
Йо́влой Била́на Бе́рс (эрс: Евлоев Берс Биланович) — гӀалгӀай йоазонхо, хоамбоаржабархо. ГӀалгӀай Мехка дукха дика хӀамаш карагӀдийна товшхала болхло. 2011-ча шера денз «Россия 1» филиал йолча «ГӀалгӀайче» яхача паччахьалкхен телерадиокомпане директор ва.
Биографи
Йовлой Билана Берс ваьв 1978-ча шера оагӀой бетта 8-ча дийнахьа Шолжа шахьара Сипсой-ГӀалий тӀа (хӀанз Шолжа-Пхье я из). 1995-ча шера ГӀалгӀай паччахьалкхен университета тархьара факультете деша а этта, 2000-ча шера из тӀехдика дийша йистеяьккхай цо. 2000—2002 шерашка «ГӀалгӀайче» яхача газета корреспондент волаш болх баьб цо. 2002 шера лайчилла бетта ГӀалгӀай Республика Мехкдаь Администраце балха эттав. Цига 2008 шера тушола беттага кхаччалца юристий отделе а Мехкдаь пресс-гӀулакхе а керттера говзанча волаш болх баьб[1].
2008 шера тушола беттагара денз 2009 шера бекарга беттага кхаччалца ГӀалгӀай Республика Мехкдаь пресс-гӀулакха кулгалхо — Мехкдаь пресс-секретарь хиннав. ТӀаккха 2010 шера лайчилла беттага кхаччалца ГӀалгӀай Республика Халкъа Гуллама аппарате хоамий-аналитикай отдела кулгалхо волаш болх баьб. Цул тӀехьагӀа юха ГӀалгӀай Республика Мехкдаь пресс-гӀулакха кулгалхо — пресс-секретара даржаш кхоачашдеш хиннав 2011 шера тушола бетта 28 денга кхаччалца[1].
2011 шера тушола бетта денз Йовлой Берс ВГТРК филиала — «ГӀалгӀайче» яхача паччахьалкхен телерадиокомпане директор ва[1].
2010-ча шера октябрь бетта Москве хиннай Россе, СНГ, доазол дехьарча къонача йоазонхой ийслагӀа юбилейни форум. Цу форуме дакъа лоацаш хиннав Йовлой Берс. Цига дуккхача цӀихезача литератораша а йоазонхоша а могадаьд цун «Лоаман Ӏадатех» («По закону гор») яха хьалхара роман[2]. Деррига Йовлой Берсас яздаь диъ роман да эрсий меттала[3].
Кинашкаш
- «Лоаман Ӏадатех» («По закону гор»). Тана-тӀара-Ростов, 2009[3];
- «Деррига дика дар» («Идеальный»). Та́на́-тӀара-Ростов, 2011[3];
- «Чья ты?». 2022[4];
- «Не бойся». 2025[5].
Сийлен совгӀаташ
- сийлен звани «ГӀалгӀай Мехка дукха дика хӀамаш карагӀдийна товшхала болхло» (2004)[1]
Белгалдаккхар
- ↑ 1 2 3 4 Патиев, 2015, оа. 51.
- ↑ Литмир. Евлоев Берс Беланович (5.08.2025). Хоам хьаийца таьрахь: 30.10.2025.
- ↑ 1 2 3 Патиев, 2015, оа. 52.
- ↑ Борис Гиреев. Литературные новинки. Роман Берса Евлоева «Чья ты?» — гимн мужеству и благородству целого поколения ингушских женщин (5.08.2025). Хоам хьаийца таьрахь: 30.10.2025.
- ↑ Борис Гиреев. Любовь победила. Вышла в свет новая книга ингушского писателя Берса Евлоева «Не бойся!» (18.04.2025). Хоам хьаийца таьрахь: 30.10.2025.
Литература
- Патиев Я. С. Писатели Ингушетии / Сост.: Я. Патиев; Нац. библ. Респ. Ингушетия им. Дж. Х. Яндиева. — Ростов н/Д.: Южный издательский дом, 2015. — 200 с. — 1000 экз. — ISBN 978‑5‑98864‑071‑4.